(ម៉ាឡេស៊ី)៖ វិចិត្រករម៉ាឡេស៊ី និងជាសកម្មជន​ម្នាក់ ឈ្មោះលោក ហ្វាមី រ៉េហ្សា (Fahmi Reza) ត្រូវបាន​តុលាការផ្តន្ទាទោស​ ឱ្យជាប់​ពន្ធនាគារ​រយៈពេល​មួយខែ​សម្រាប់​​ការគូសរូបត្លុកកំប្លែង​ចំអក លោកនាយករដ្ឋមន្ត្រី ណាជីព រ៉ាហ្សាក់ (Najib Razak)។ នេះបើតាម​ការចេញ​ផ្សាយ ដោយ​សារព័ត៌មាន Sputnik នៅរសៀលថ្ងៃពុធ ទី២១ ខែកុម្ភៈ ឆ្នាំ២០១៨។

នៅក្នុងសវនាការ​នៅភាគខាងជើងទីក្រុង Ipoh លោក Reza ត្រូវបានតុលាការ​ផ្ដន្ទាទោស​ ឱ្យជាប់ពន្ធនាគារ​រយៈពេល​មួយខែ និងពិន័យជា​ប្រាក់ប្រមាណ​ជា ៧,៧០០ដុល្លារ។ ការសម្រេច​ចិត្ត​នេះ ធ្វើឡើងក្រោយ​តុលាការរកឃើញ​ថា លោកបាន​ប្រមាថនៅតាមបណ្ដាញ​អ៊ីនធើណែត ហើយលោកក៏​អាចនឹងប្រឈមមុខ​នឹងការកាត់ទោស​ស្រដៀងគ្នានេះ នៅតុលាការផ្សេង ទៀតផងដែរ។ ទោះបីជាយ៉ាង​នេះក្ដី មេធាវីរបស់វិចិត្រករវ័យ ៤០ឆ្នាំរូបនេះ បានអះអាងថា លោកមាន​ការខកចិត្តជាខ្លាំង​ ចំពោះ​ការសម្រេចចិត្ត​របស់តុលាការ ហើយថា​នឹងប្ដឹងជំទាស់​នឹងសាលក្រម​នេះ។

គួររំលឹកថា លោក Fahmi Reza ត្រូវបានឃាត់​ខ្លួនកាលពីឆ្នាំ២០១៦ ជាមួយនឹងក្រុម​សកម្មជន និងមេដឹកនាំ​ប្រឆាំងជា​ច្រើននាក់ នៅអំឡុងបាតុកម្ម​តវ៉ាប្រឆាំង​នឹង​នាយករដ្ឋមន្ត្រី​លោក Najib ដែលកំពុងជាប់ផុង​ក្នុងរឿងអាស្រូវ​ពុករលួយ តាមរយៈការទទួល​ប្រាក់រាប់លានដុល្លារ​ ពីគ្រួសាររាជវង្ស​អារ៉ាប៊ីសាអូឌីត៕​