(ញូយ៉ក)៖ តំណាងពិសេស​អង្គការសហប្រជាជាតិ​ សម្រាប់ប្រទេស​អ៊ីរ៉ាក់ លោក ចេន គូប៊ីស (Jan Kubis) បានសង្កត់​ធ្ងន់ពីសារៈ​សំខាន់​ នៃការបោះឆ្នោត​សភា​ ដែលគ្រោងនឹង​ធ្វើឡើង​នៅថ្ងៃទី១២ ខែឧសភា ខាងមុខ​នេះ នៅក្នុងប្រទេសអ៊ីរ៉ាក់។ នេះបើតាមការចេញផ្សាយ ដោយទីភ្នាក់ងារ​សារព័ត៌មាន​ចិន ស៊ីនហួរ នៅព្រឹកថ្ងៃពុធ ទី២១ ខែកុម្ភៈ ឆ្នាំ២០១៨។​

លោក Jan Kubis ថ្លែងបែបនេះ​ នៅចំពោះមុខក្រុមប្រឹក្សាសន្តិសុខ​អង្គការ​សហប្រជាជាតិ កាលពី​ថ្ងៃអង្គារ។ ថ្លែងនា​ឱកាសនោះ​ដែរ តំណាងពិសេស​រូបនេះ បានលើក​ឡើងយ៉ាងដូច្នេះថា «ការបោះឆ្នោតគួរឱ្យ​ទុកចិត្ត និងអាចទទួល​យកបាន ជាមួយការចូលរួម​ក្នុងកំរិតខ្ពស់ ក្នុងនោះរួមមាន​ទាំងតំបន់រំដោះ និងតំបន់​ឃើដអ៊ីរ៉ាក់ ក៏ដូចជាវិធានការ​សម្រួលដល់ការ​ចូលរួម​របស់ស្ត្រី នឹងផ្ដល់អំណាច​ដល់រដ្ឋាភិបាលអ៊ីរ៉ាក់​ថ្មី ក្នុងការធ្វើកំនែទម្រង់ លើកម្ពស់​ការផ្សះផ្សាជាតិ និងគ្រប់ក្រុម​ទាំងអស់នៅក្នុង​ប្រទេសអ៊ីរ៉ាក់»

គួរជំរាបថា បើតាម​លោក Jan Kubis គណៈកម្មធិការបោះឆ្នោត​អ៊ីរ៉ាក់ បានចុះឈ្មោះ​គណបក្សនយោបាយ​ចំនួន ២០៥ និងក្រុមចំរុះ​នយោបាយ ២៧ សម្រាប់ចូលរួម​ក្នុងការ​បោះឆ្នោត៕