(អង់ការ៉ា)៖ រដ្ឋាភិបាលតួកគី បានចេញមកព្រមានរដ្ឋាភិបាលស៊ីរី ជុំវិញការបញ្ជូនកងទ័ពស៊ីរី ទៅក្នុងតំបន់ Afrin ដើម្បីជួយ​ក្រុម​​សកម្មប្រយុទ្ធឃើដ ដែលទីក្រុងអង់ការ៉ា បាននិងកំពុងបន្តប្រតិបត្តិការយោធាយ៉ាងក្តៅគគុក ដើម្បីបោសសម្អាតចោលនៅទីនោះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃអង្គារ ទី២០ ខែ​កុម្ភៈ ឆ្នាំ២០១៨។

ឧបនាយករដ្ឋមន្រ្តីតួកគី និងជាអ្នកនាំពាក្យរដ្ឋាភិបាល លោក Bekir Bozdag បានថ្លែងប្រាប់ក្រុមអ្នកសារព័ត៌មាន នៅក្រោយកិច្ច​ប្រជុំគណៈរដ្ឋមន្រ្តីមួយ ក្នុងរដ្ឋធានីអង់ការ៉ាថា ការសម្រេចចិត្តណាមួយ ដោយរដ្ឋាភិបាលស៊ីរី ដើម្បីបញ្ជូនកម្លាំងយោធា ទៅ​កាន់​ទីក្រុង Afrin នឹងជាការបើកដៃឲ្យស៊ីរីមានការបែកបាក់ ហើយនឹងបង្កជាគ្រោះមហន្តរាយផ្សេងៗនៅក្នុងតំបន់។

នាដើមសប្តាហ៍នេះ រដ្ឋមន្រ្តីការបរទេសតួកគី លោក Mevlut Cavusolgu ក៏បានព្រមានទីក្រុងដាម៉ាស់ផងដែរ ដោយ​ប្រមុខ​ការ​ទូត​​តួកគី​រូប​នេះ បានបញ្ជាក់ថា ប្រសិនបើកងទ័ពស៊ីរី ហ៊ានលូកដៃចូលមកការពារក្រុមអ្នកប្រយុទ្ធឃើដ YPG ម្ល៉ោះហើយ​ពុំមានអ្វីមួយ​ឬក៏នរណាម្នាក់ អាចបញ្ឈប់កងទ័ពរបស់តួកគីបានឡើយ។

ម៉្យាងវិញទៀត ប្រធានាធិបតីតួកគី លោក Reccep Tayyip Erdogan ក៏បានជួបពិភាក្សា​តាមទូរស័ព្ទដាច់ដោយឡែកពីគ្នា​ ជាមួយ​សម​ភាគី​​រុស្ស៊ី លោក វ៉្លាឌីមៀ ពូទីន ព្រមទាំងសមភាគីអ៊ីរ៉ង់លោក Hassan Rouhani ដើម្បីព្រមានប្រឆាំងនឹងទង្វើដូចគ្នាផងដែរ (ការបញ្ជូនទ័ពមកជួយ​ក្រុមឃើដ)។

គួរជម្រាបថា ក្រុម YPG ត្រូវទីក្រុងអង់ការ៉ា ចាត់ទុកជាបណ្តាញប្រចាំនៅស៊ីរីរបស់គណបក្សពលករ PKK ដែលជាអង្គការភេរវកម្ម​មួយ នៅក្នុងបញ្ជីរបស់តួកគី។ តួកគី បានបើកប្រតិបត្តិការយោធាទ្រង់ទ្រាយធំមួយ កាលពីថ្ងៃទី២០ ខែមករាកន្លងទៅ ចូលក្នុង​តំបន់ Afrin ភាគខាងជើងស៊ីរី ដើម្បីវាយកម្ទេចក្រុមអ្នកប្រយុទ្ធ YPG៕