(អ៊ីរ៉ង់)៖ ស្ថានីយទូរទស្សរដ្ឋអ៊ីរ៉ង់ នៅថ្ងៃចន្ទនេះ បានលុបចោលភ្លាមនូវសេចក្ដីរាយការណ៍ដែលថាបំណែកយន្ដហោះ ត្រូវបានគេរកឃើញ បន្ទាប់ពីយន្ដហោះដឹកអ្នកដំណើរ និងក្រុមអាកាសយាននិក៦៥នាក់ បានធ្លាក់កាលពីថ្ងៃអាទិត្យ។ នេះបើតាមការចេញផ្សាយដោយសារព័ត៌មាន CNN​ នៅថ្ងៃចន្ទ ទី១៩ ខែកុម្ភៈ ឆ្នាំ២០១៨។

ការលុបចោលសេចក្ដីរាយការណ៍ខាងលើ កើតមានឡើងក្រោយសារព័ត៌មានជាច្រើននៅក្នុងស្រុកបានចុះផ្សាយថា បំណែកយន្ដហោះដែលធ្លាក់នៅឯតំបន់ភ្នំមួយកន្លែង ត្រូវបានគេរកឃើញនៅឯតំបន់ Dengezlu នៃខេត្ត Ispahan។ ប៉ុន្តែសេចក្ដីរាយការណ៍ នេះត្រូវបានលុបចោលទៅវិញដោយសា្ថនីយទូរទស្សន៍រដ្ឋអ៊ីរ៉ង់ ដោយអះអាងថាពុំទាន់មាន ព័ត៌មានគួរឱ្យទុកចិត្តពាក់ព័ន្ធនឹងការរកឃើញបំណែកយន្ដហោះនៅឡើយទេ ខណៈក្រុមអ្នកជួយសង្រ្គោះកំពុងបន្ត ប្រតិបត្តិការរុករក ក្រោមអាកាសធាតុមិនអំណោយផល។ មិនតែប៉ុណ្ណោះ ក៏មិនទាន់មានព័ត៌មានថាក្រុមអ្នកជួយ សង្រ្គោះចូលទៅដល់ទីតាំងយន្ដហោះធ្លាក់នៅឡើយដែរ។  

គួរបញ្ជាក់ថា យន្តហោះ​ប្រភេទ ATR-72 មានជើងហោះ​ហើរលេខ EP3704 ផលិតនៅ​​ឆ្នាំ១៩៩៣ ដែលត្រូវបានចាត់​ទុកជាយន្តហោះ​វ័យចំណាស់មួយ ទុកសម្រាប់ធ្វើ​ដំណើរ​តែ​ក្នុងស្រុក ដែលមានរយៈចម្ងាយ​ខ្លីប៉ុណ្ណោះ ហើយវាបាន​ធ្លាក់នៅព្រឹក​ថ្ងៃអាទិត្យ (ម៉ោងនៅ​ទីក្រុង​តេហេរ៉ង់) ដោយបានសម្លាប់​មនុស្សទាំង​អស់ ៦៥នាក់ (អ្នកដំណើរ ៥៩នាក់ និង​សហសេវិក ០៦នាក់) ដែលពីដំបូង​ឡើយមានសេចក្តីរាយការណ៍​ថា មនុស្សជិះនៅលើនោះ​ទាំងអស់​មានរហូតដល់ ៦៦នាក់។ ចំណែកឯ កត្តាចម្បងដែល​បាននាំឲ្យយន្តហោះ​​ធុនមធ្យមរបស់អ៊ីរ៉ង់ ធ្លាក់នៅតំបន់​ភ្នំភាគខាងត្បូង​ប្រទេសនេះ អាចបណ្តាលមក​ពី​កត្តាអាកាសធាតុអាក្រក់​​ជាចម្បង ដែលមាន​ដូចជា អ័ព្ទចុះខ្លាំង ព្រិលធ្លាក់ និងខ្យល់បក់បោក​ខ្លាំងជាដើម៕

យន្តហោះ ATR-72 មានគោលដៅ​ពីទីក្រុងតេហេរ៉ង់ ឆ្ពោះទៅកាន់​ទីក្រុង Yasuj ភាគខាងត្បូង​ប្រទេសដែលមានចម្ងាយ ​ហោះហើរ ៧៨០គីឡូម៉ែត្រ ប៉ុន្តែវា​បានធ្លាក់នៅតំបន់​ភ្នំ Zagros ដែលមានអាកាសធាតុ​អាក្រក់ខ្លាំង៕