(វ៉ាស៊ីនតោន)៖ យន្តហោះមួយគ្រឿងរបស់ក្រុមហ៊ុនអាកាសចរណ៍អាមេរិក United Airlines ដែលមានគោលដៅចេញពីទីក្រុងសាន់ហ្វ្រាន់ស៊ីស្កូ (San Francisco) រដ្ឋកាលីហ្វរញ៉ា ទៅកាន់ទីក្រុងហូណូលូលូ (Honolulu) បានធ្វើឲ្យអ្នកដំណើរជាច្រើននាក់នៅលើនោះ មានការភ័យរន្ធត់ជាខ្លាំង នៅពេលដែលម៉ាស៊ីនមួយចំហៀងរបស់វា ចាប់ផ្តើមជ្រុះបន្តិចម្តងៗ មុនពេលចុះចតកន្លះម៉ោង។ នេះបើតាមការដកស្រង់ការផ្សាយចេញពីសារព័ត៌មានអង់គ្លេស Daily Mail (Mail Online) នៅល្ងាចថ្ងៃពុធ ទី១៤ ខែកុម្ភៈ ឆ្នាំ២០១៨។
យន្តហោះដឹកអ្នកដំណើរខាងលើរបស់ United Airlines មានជើងហោះហើរលេខ UA1175 នៅសល់ពេលរហូតដល់ ៣៦នាទី មុនត្រូវចុះចតនៅលើកោះ Oahu នៃរដ្ឋហាវ៉ៃ នៅពេលដែលសន្ទះនៃម៉ាស៊ីនផ្នែកខាងស្តាំរបស់យន្តហោះ ចាប់ផ្តើមជ្រុះពីលើមេឃជាបន្តបន្ទាប់។ ទោះបីជាហេតុការណ៍នេះ បានបណ្តាលឲ្យអ្នកដំណើរជាច្រើននាក់នៅលើនោះ លោះព្រលឹងមួយសន្ទុះធំក៏ដោយ យន្តហោះ UA1175 បានធ្វើការចុះចតដោយសុវត្ថិភាព នៅព្រលានយន្តហោះក្នុងទីក្រុង Honolulu ហើយក្រុមពន្លត់អគ្គីភ័យ និងជួយសង្រ្គោះ ក៏បានរួសរាន់ទៅកាន់កន្លែងយន្តហោះចុះភ្លាមៗផងដែរ។
គួរជម្រាបថា ក្រោយពីចុះដល់ដី អ្នកដំណើរបានចាកចេញពីយន្តហោះជាធម្មតា ដោយវាគឺជារឿងសំណាងបំផុត ដែលបញ្ហានេះ ពុំបានបង្កជាគ្រោះថ្នាក់ដ៏ធំមួយនោះ៕
