(ម៉ានីល)៖ ហ្វីលីពីន និងចិនបានព្រមព្រៀងគ្នា បង្កើតក្រុមការងារពិសេសមួយ ដើម្បីរិះរកវិធី ដែលអាចឲ្យប្រទេសទាំងពីររួមគ្នារុករកប្រេង និងឧស្ម័ន នៅតាមតំបន់សមុទ្រចិនខាងត្បូង ដែលភាគីទាំងពីរ បានទាមទារសិទ្ធិកាន់កាប់ ដោយមិនឲ្យប៉ះពាល់បញ្ហាដែនអធិបតេយ្យភាពនោះឡើយ។ នេះបើតាមការចេញផ្សាយដោយ សារព័ត៌មាន Channel New Asia នៅរសៀលថ្ងៃពុធ ទី១៤ ខែកុម្ភៈ ឆ្នាំ២០១៨។
ថ្លែងទៅកាន់ក្រុមអ្នកសារព័ត៌មាន បន្ទាប់ពីក្រុមមន្រ្តីទូតនៃប្រទេសទាំងពីរ បានជួបពិភាក្សាគ្នាជាលើកទីពីរ នៅក្រោមយន្តការទ្វេភាគីមួយ ដែលមានគោលដៅបន្ធូរបន្ថយភាពតានតឹង ក្នុងដែនសមុទ្រដ៏យូរអង្វែងនេះ ឯកអគ្គរដ្ឋទូតហ្វីលីពីនប្រចាំប្រទេសចិន លោក ជីតូ ស្ទេត រ៉ូម៉ាណា (Chito Stat. Romana) បានឲ្យដឹងថា វាគ្រាន់តែជាកិច្ចចាប់ផ្តើម នៃនីតិវិធីមួយប៉ុណ្ណោះ ប៉ុន្តែទន្ទឹមនឹងនេះ ការសម្រេចចិត្តដើម្បីបង្កើតក្រុមការងារ ស្តីពីកិច្ចសហប្រតិបត្តិការពាក់ព័ន្ធនឹងបញ្ហាថាមពល ក៏ជាការអភិវឌ្ឍដ៏សំខាន់មួយផងដែរ។
ការបង្កើតកិច្ចព្រមព្រៀងសម្រាប់គម្រោងរួមមួយ នឹងអាចជាបញ្ហាដ៏ស្មុគស្មាញ ដោយសារតែប្រទេសទាំងពីរ ការទាមទារសិទ្ធិកាន់កាប់រៀងៗខ្លួន លើទីតាំងដែលស្តុកទុកនូវធនធានប្រេង និងឧស្ម័ន ដូច្នេះហើយការចែករំលែកពួកវា អាចត្រូវចាត់ទុកថា ជាការផ្តល់សិទ្ធិទទួលស្គាល់ពេញច្បាប់ ចំពោះការទាមទារសិទ្ធិរបស់ភាគីម្ខាង ឬក៏ជាការបោះបង់ ដែនអធិបតេយ្យភាពរបស់ខ្លួនឯងខ្លះចោល។
គួរជម្រាបថា ចិនបានទាមទារសិទ្ធិកាន់កាប់ស្ទើរតែទាំងស្រុង នៅតំបន់សមុទ្រចិនខាងត្បូង ជាទីដែលការធ្វើពាណិជ្ជកម្មតាមកប៉ាល់ មានតម្លៃសរុបប្រមាណ ០៣ពាន់លានដុល្លារ ក្នុងមួយឆ្នាំៗ ហើយបានបន្តប្រជែងយកសិទ្ធិគ្រប់គ្រង នៅតាមផ្នែកផ្សេងៗនៃតំបន់ផ្លូវទឹកដ៏សំខាន់នេះ ជាមួយព្រុយណេ ម៉ាឡេស៊ី តៃវ៉ាន់ វៀតណាម និងហ្វីលីពីន៕
