(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានលើកឡើងថា ទំនាក់ទំនងអាមេរិក-ចិន មានសារសំខាន់ខ្លាំងក្រៃលែង ហើយទីក្រុងវ៉ាស៊ីនតោនស្ម័គ្រចិត្តជានិច្ច ដើម្បីពង្រឹងកិច្ចសហប្រតិបត្តិការជាមួយប្រទេសចិន ក្នុងគោលបំណងលើកកម្ពស់ចំណងទ្វេភាគី។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី១០ ខែកុម្ភៈ ឆ្នាំ២០១៨។
លោក ដូណាល់ ត្រាំ បានធ្វើការអត្ថាធិប្បាយបែបនេះ ក្នុងឱកាសនៃការទទួលជួបរបស់លោក ជាមួយប្រធានក្រុមប្រឹក្សារដ្ឋមកពីប្រទេសចិន លោក យ៉ាង ជាឈី (Yang Jiechi) នៅឯបន្ទប់ Oval Office របស់សេតវិមាន។ ដោយនិយាយថា ដំណើរទស្សនកិច្ចផ្លូវរដ្ឋរបស់លោក ទៅកាន់ចិនកាលពីខែវិច្ឆិកាឆ្នាំទៅ គឺជាជោគជ័យដ៏ធំសម្បើមមួយ លោក ត្រាំ បានយល់ស្របថា ភាគីទាំងពីរគួរតែអនុវត្តន៍ឲ្យពេញលេញនូវកិច្ចព្រមព្រៀង ដែលសម្រេចបានដោយប្រធានាធិបតីចិន លោក ស៊ី ជិនពីង ហើយនិងរូបលោកកាលពីជំនួប នៃមេដឹកនាំទាំងពីរ នៅឯទីក្រុងប៉េកាំង។
គួរជម្រាបថា លោក Yang Jiechi បានបំពេញទស្សនកិច្ចរយៈពេល ០២ថ្ងៃ មកកាន់រដ្ឋធានីវ៉ាស៊ីនតោន ហើយក៏បានជួបជាមួយរដ្ឋមន្រ្តីការបរទេសអាមេរិក លោក រ៉ិច ធីល្លឺសុន (Rex Tillerson) ផងដែរ៕
