(ពិភពលោក)៖ នៅថ្ងៃសុក្រ ទី០៩ ខែកុម្ភៈ ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថា តើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះ សូមទស្សនាដូចខាងក្រោម៖
១៖ រដ្ឋមន្ត្រីការបរទេសអាមេរិក លោក រិច ធីល្លឺសុន និងមន្ត្រីការទូតជាន់ខ្ពស់ចិន លោក យ៉ាង ជាឈី បានអះអាងឡើងវិញពីការប្ដេជ្ញាចិត្ត រវាងប្រទេសទាំងពីរក្នុងការដាក់សម្ពាធលើ ទីក្រុងព្យុងយ៉ាងទាក់ទិននឹងកម្មវិធីអាវុធនុយក្លេអ៊ែរ។
២៖ ក្រុមហ៊ុនផលិតសព្វាវុធយក្សអាមេរិក រំពឹងថាសិង្ហបុរី នឹងទិញយន្តហោះបំបាំងកាយ F-35 ព្រោះជាផលិតផលល្អផ្តាច់គេ។
៣៖ តុលាការចិន កាត់ទោសប្រហារជីវិតស្ត្រីម្នាក់ ដែលបានបង្កគ្រោះអគ្គីភ័យផ្តាច់ជីវិតម្តាយ និងកូនៗសរុប០៤នាក់។
៤៖ មានសេចក្តីរាយការណ៍ព័ត៌មានថា ទ័ពអាកាសចិន បញ្ជូនយន្តហោះចម្បាំង Su-35 ទើបទិញពីរុស្ស៊ី ទៅល្បាតសមុទ្រចិនខាងត្បូង ចំពោះមុខការចល័តនាវាចម្បាំងអាមេរិក។
៥៖ ទីបំផុតប្រធានសភាជាន់ខ្ពស់កូរ៉េខាងជើង និងប្អូនស្រីបង្កើតលោក គីម ជុងអ៊ុន ព្រមទាំងគណៈប្រតិភូជាន់ខ្ពស់ មកដល់ទឹកដីកូរ៉េខាងត្បូងដោយសុវត្ថិភាព ដើម្បីត្រៀមចូលរួមពិធីបើកព្រឹត្តិការណ៍អូឡាំពិករដូវរងាលើកទី២៣។
៦៖ មន្ត្រីទ័ពអាកាសឥណ្ឌា ត្រូវចាប់ខ្លួនដោយសារ ធ្វើឲ្យបែកធ្លាយព័ត៌មានសម្ងាត់យោធា ទៅឲ្យមន្ត្រីចារកម្មប៉ាគីស្ថាន ប្រុសបន្លំខ្លួនធ្វើស្រី។
៧៖ រដ្ឋាភិបាលអាមេរិក ប្រកាសបិទជាផ្លូវការលើកទីពីរ ដោយសារព្រឹទ្ធសភា មិនអាចអនុម័តកញ្ចប់ថវិកាទាន់ពេល៕
