(វ៉ាស៊ីនតោន)៖ រដ្ឋាភិបាល​អាមេរិក បានសម្រេចបិទទាំងស្រុងម្តង​ទៀតហើយ នៅយប់​ថ្ងៃព្រហស្បតិ៍ (ម៉ោងនៅវ៉ាស៊ីនតោន) ដោយសារតែ​ព្រឹទ្ធសភា មិនអាច​អនុម័តកញ្ចប់​ថវិកាទាន់ពេល ក៏ព្រោះតែផុត​កាលកំណត់ ដែលត្រូវបាន​រៀបចំទុកនោះ​ទៅហើយ។ នេះបើតាម​​ការចេញ​ផ្សាយព័​ត៌មាន​ នៅមុននេះបន្តិច ដោយ​ទីភ្នាក់ងារ​ព័ត៌មានចិន ស៊ីនហួរ នារសៀល​ថ្ងៃសុក្រ ទី០៩ ខែកុម្ភៈ ឆ្នាំ២០១៨។

ការសម្រេចបិទ​រដ្ឋាភិបាលអាមេរិក នៅយប់ថ្ងៃព្រហស្បតិ៍​សប្តាហ៍នេះ គឺជាលើកទីពីរ​សម្រាប់ដើម​ឆ្នាំ២០១៨ ដែលរដ្ឋបាល ដូណាល់ ត្រាំ ត្រូវជាប់គាំង ខណៈដែល​ថ្ងៃព្រហស្បតិ៍​នេះ គឺជាថ្ងៃកំណត់​ចុងក្រោយ នៃការពិភាក្សា​អនុម័តថវិកាផ្គត់ផ្គង់​រដ្ឋាភិបាល ប៉ុន្តែ​ពេលវេលា​​បានហួសទៅហើយ ដោយសមាជិកព្រឹទ្ធសភាទាំងអស់ មិនអាច​សម្រេចចេញនូវគោលដៅ​នេះបាន។

គួរបញ្ជាក់ថា យោងតាមអ្វី​ដែលបានកើតមាន​ឡើងនេះ រដ្ឋាភិបាល​អាមេរិក នឹងចាប់ផ្តើមបិទ​ជាផ្លូវការ​គិតចាប់តាំងពីថ្ងៃសុក្រ​ស្អែកនេះតទៅ (ម៉ោងនៅវ៉ាស៊ីនតោន) រហូតដល់​​មានការ​អនុម័តកញ្ចប់​ថវិកាឡើងវិញដោយសភា ទើបអាចដំណើរការ​ជាធម្មតា​ដូចមុនបាន៕