(សេអ៊ូល)៖ ទីបំផុតយន្តហោះដែលដឹកគណៈប្រតិភូជាន់ខ្ពស់ មកពីប្រទេសកូរ៉េខាងជើង បានធ្វើដំណើរមកដល់ព្រលានយន្តហោះអន្តរជាតិ អ៊ីនឈាន់ របស់ប្រទេសកូរ៉េខាងត្បូងហើយ ដើម្បីត្រៀមចូលរួមពិធីបើកព្រឹត្តិការណ៍អូឡាំពិករដូវរងា នាល្ងាចថ្ងៃសុក្រនេះ។ នេះបើតាមសេចក្តីរាយការណ៍របស់ បណ្តាញស្ថានីយទូរទស្សន៍ក្នុងស្រុកកូរ៉េខាងត្បូង ដកស្រង់ដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃសុក្រ ទី០៩ ខែកុម្ភៈ ឆ្នាំ២០១៨។
សម្រាប់មន្រ្តីរដ្ឋាភិបាលទីក្រុងសេអ៊ូល ដែលនៅរង់ចាំទទួលដំណើរទស្សនកិច្ចខាងលើ គឺរដ្ឋមន្ត្រីក្រសួងបង្រួបបង្រួមជាតិកូរ៉េខាងត្បូង លោក ចូ ម្យាំងក្យុន (Cho Myoung Gyon) រួមនិងមន្រ្តីជាន់ខ្ពស់កូរ៉េខាងត្បូងជាច្រើនរូបទៀត នៅឯអាកាសយានដ្ឋានអន្តរជាតិ អ៊ីនឈាន់ (Incheon)។
សម្រាប់មន្ត្រីជាន់ខ្ពស់កូរ៉េខាងជើង ដែលនឹងមកដល់កូរ៉េខាងត្បូង ប៉ុន្មានម៉ោងខាងមុខនេះរួមមាន លោក គីម យ៉ុងណាំ ប្រធានសភាជាន់ខ្ពស់កូរ៉េខាងជើង ដែលជាអ្នកដឹកនាំក្រុមប្រតិភូ, អ្នកនាង គីម យ៉ូជុង ប្អូនស្រីបង្កើត លោក គីម ជុងអ៊ុន មានតួនាទីជាអនុប្រធានគណកម្មាធិការមជ្ឈិមបក្សពលករកូរ៉េ ដែលជាបក្សកាន់អំណាចតែមួយគត់នៅកូរ៉េខាងជើង, ព្រមទាំងតំណាង រដ្ឋាភិបាលទីក្រុងព្យុងយ៉ាងជាច្រើនរូបទៀត ដែលអមដំណើរមក។
គួរបញ្ជាក់ថា តំណាងកូរ៉េខាងជើងដែលមកកាន់កូរ៉េខាងត្បូងនោះ គឺដើម្បីចូលរួមពិធីបើកព្រឹត្តិការណ៍កីឡាអូឡាំពិករដូវរងា នៅទីក្រុងព្យឿងចាងទឹកដីកូរ៉េខាងត្បូង ដែលកូរ៉េខាងជើងក៏បានបញ្ជូនអត្តពលិករបស់ខ្លួនមកចូលរួមប្រកួត និងក្រុមតន្ត្រីចំរុះមកធ្វើការសម្តែងផងដែរ។ បន្ថែមពីនេះទៀត ប្រធានាធិបតីកូរ៉េខាងត្បូង លោក មូន ជែអ៊ីន ក៏បានត្រៀមខ្លួនទទួលជួបគណប្រតិភូជាន់ខ្ពស់កូរ៉េខាងជើងទាំងអស់ ដែលនឹងក្លាយជាឱកាសដ៏កម្រមានបំផុត នៃជំនួបផ្លូវការថ្នាក់រដ្ឋាភិបាល នៃអតីតបងប្អូនកូរ៉េទាំងពីរ៕
