(សិង្ហបុរី)៖ អនុប្រធានប្រតិបត្តិ នៃក្រុមហ៊ុនផលិតសព្វាអាវុធអាមេរិក ឡុកហ៊ីដ ម៉ាទីន (Lockheed Martin) គឺលោក រីក អ៊ែដវើដស៍ (Rick Edwards) បាននិយាយថា ក្រុមហ៊ុនរបស់លោកកំពុងស្វែងរកអតិថិជនថ្មី ទិញយន្ដហោះចម្បាំង-បំបាំងកាយអាមេរិក F-35 ហើយថា ប្រទេសសិង្ហបុរីអាចនឹងចាប់អារម្មណ៍ទិញ យន្តហោះចម្បាំងប្រភេទនេះ។ នេះបើតាមការចេញផ្សាយដោយ សារព័ត៌មាន Sputnik នៅព្រឹកថ្ងៃសុក្រ ទី០៩ ខែកុម្ភៈ ឆ្នាំ២០១៨។
ថ្លែងប្រាប់ទីភ្នាក់ងារសារព័ត៌មាន Reuters លោក Rick Edwards បានលើកឡើងដូច្នេះថា «ខ្ញុំគិតថា ពួកគេកំពុងវាយតម្លៃយ៉ាងម៉ត់ចត់ ចំពោះយន្ដហោះចម្បាំង F-35 ដែលជាប្រភេទយន្ដហោះចម្បាំងល្អដាច់គេ។ ខ្ញុំប្រាកដថា ពួកគេនឹងគិតដូច្នេះ ហើយបើពួកគេត្រៀមខ្លួនរួចរាល់ យើងនឹងឆ្លើយតបទៅវិញភ្លាម»។
គួរបញ្ជាក់ថា បើតាមអ្នកជំនាញផ្នែកអាកាសចរណ៍ លោក រីឆាដ អាប៊ួឡាហ្វយ៉ា (Richard Aboulafia) ទីផ្សារសព្វាវុធនៅអាស៊ី គឺស្ថិតនៅក្នុងចំណោមទីផ្សារដ៏ធំនៅក្នុងពិភពលោក ពោលគឺកាលពីឆ្នាំ២០១៥ ជប៉ុន កូរ៉េខាងត្បូង អូស្ត្រាលី និងសិង្ហបុរី គឺជាប្រទេសដែលបានទិញយន្ដហោះចម្បាំងក្នុងតម្លៃលើស ៥០លានដុល្លារ លើកលែងអ៊ីស្រាអែល និងអារ៉ាប៊ីសាអូឌីត៕
