(ពិភពលោក)៖ នៅថ្ងៃព្រហស្បតិ៍ ទី០៨ ខែកុម្ភៈ ឆ្នាំ២០១៨នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើត ឡើងរួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះ បើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ កូរ៉េខាងជើង បានដឹកនាំការធ្វើព្យុហយាត្រាយោធានៅថ្ងៃព្រហស្បតិ៍នេះក្នុងទីក្រុងព្យុងយ៉ាង ដើម្បីរំលឹកដល់ថ្ងៃ បង្កើតកងទ័ពរបស់ខ្លួន ពោលគឺមួយថ្ងៃតែប៉ុណ្ណោះ មុននឹងព្រឹត្តិការណ៍កីឡាអូឡាំពិករដូវរងានៅឯទីក្រុង Pyeong Chang ប្រទេសកូរ៉េខាងត្បូង ចូលមកដល់នៅថ្ងៃសុក្រស្អែកនេះ៕
២៖ ក្រុមចំរុះអន្តរជាតិមានសហរដ្ឋអាមេរិកជាបងធំ បានបើកការវាយប្រហារតាមផ្លូវអាកាស និងកាំភ្លើងធំយ៉ាងសន្ធាប់ ដោយផ្ដាច់យកជីវិតកងកម្លាំងស្ម័គ្រស្មោះនឹងប្រធានាធិបតីស៊ីរី លោក បាស្សា អាល់ អាស្សាដ ច្រើនជាង ១០០នាក់ នៅស៊ីរី៕
៣៖ ប្រទេសបារាំងកំពុងទទួលរងការចុះត្រជាក់ និងធ្លាក់ព្រិលយ៉ាងខ្លាំងក្លា ជាពិសេសនៅតំបន់ភាគខាងជើងប្រទេស រួមទាំងរដ្ឋធានីប៉ារីស និងទីតាំងនៅជុំវិញនោះ៕
៤៖ ទោះបីជាព្រះច័ន្ទ ជាបុត្របង្កើតនៃភពផែនដីក៏ដោយ ប៉ុន្តែបើសិនជាទីឋានទាំងពីរនេះគោចរមកកៀកគ្នា ក្នុងរយៈ ពេលកំណត់មួយដោយខានមិនបាននោះ វានឹងបង្កជាគ្រោះធម្មជាតិជាច្រើន ដែលមនុស្សលោកធ្លាប់ប្រឈមមុខជាច្រើនដងមកហើយ ចាប់តាំងពីអតីតកាល រហូតមកដល់ទល់បច្ចុប្បន្ន និងបន្តទៅថ្ងៃអនាគត៕
៥៖ ដ្ឋាភិបាលទីក្រុងប៉េកាំង នឹងផ្តោតទៅលើកស្ទួយការប្រើប្រាស់ដ្រូន (Drone) នៅក្នុងវិស័យគមនាគមន៍របស់ខ្លួន ដើម្បីលើកកម្ពស់ប្រសិទ្ធភាព សុវត្ថិភាព ព្រមទាំងគុណភាពនៃវិស័យដ៏សំខាន់ ខណៈដែលចិនបានដាក់គោលដៅ ប្រែក្លាយខ្លួនជាអ្នកនាំមុខគេក្នុងវិស័យគមនាគមន៍ ដែលមានគុណភាពក៏ដូចជាប្រសិទ្ធភាព ព្រមទាំងក្នុងការបង្កើតគំនិតច្នៃប្រឌិត តាមបែបបច្ចេកវិទ្យា៕
៦៖ រដ្ឋមន្ត្រីការបរទេសចិន លោក វ៉ាង យី បាននិយាយថា ទីក្រុងប៉េកាំងសង្ឃឹមថា កូរ៉េខាងជើង និងកូរ៉េខាងត្បូង អាចរក្សាសន្ទុះនៃទំនាក់ទំនងគ្នាដូចបច្ចុប្បន្ន ដើម្បីបើកទ្វារចូលអង្គុយចរចាគ្នា ស្វែងរកសន្តិភាពសម្រាប់តំបន់ឧបទី្វបកូរ៉េ៕
