(តៃវ៉ាន់)៖ អាជ្ញាធរ​កោះតៃវ៉ាន់​បានបញ្ជាក់ថា គិតត្រឹម​ព្រឹក​ថ្ងៃព្រហស្បតិ៍នេះ ចំនួនអ្នកស្លាប់​នៅក្នុងគ្រោះ​រញ្ជួយដី​កម្រិត ៦.៥រ៉ិចចទ័រ នៅក្នុង​ទីក្រុងហ័រលៀន (Hualien) បានកើន​ដល់ ០៩នាក់ហើយ ខណៈមនុស្ស ២៦៥នាក់រងរបួស និង ៦២នាក់ទៀត នៅតែបន្តបាត់ខ្លួននៅ​ឡើយ។ នេះបើ​​តាមការ​ចេញផ្សាយ​ដោយ ទីភ្នាក់ងារ​សារព័ត៌មាន​ចិន ស៊ីនហួរ នៅព្រឹកថ្ងៃព្រហស្បតិ៍ ០៨ ខែកុម្ភៈ ឆ្នាំ២០១៨។

យោងតាម​អាជ្ញាធរតៃវ៉ាន់ ជងរងគ្រោះ ០៣នាក់ ជាភ្ញៀវទេសចរ​មកពីចិន​ដីគោក ហើយពីរនាក់​ក្នុងចំណោមពួកគេ​ ត្រូវបានគេទាញចេញពី​គំនរបាក់បែក​នៃអគារ យុនមិន (Yun Men Tusi Ti) នៅព្រឹក​ថ្ងៃព្រហស្បតិ៍នេះ។​ ចំណែកឯ ស្ត្រីអ្នកទេសចរម្នាក់ទៀត​មកពី ខេត្ត ហ្វូចៀន (Fujian) ត្រូវបានគេជួយ​សង្រ្គោះ​ពីអគារខាងលើ​ដដែល កាលពីថ្ងៃពុធ ប៉ុន្តែគាត់​បានស្លាប់នៅ​ម៉ោង ៩៖០០នាទី​យប់ថ្ងៃ​ដដែល។

គួររំលឹកថា បើតាម​មជ្ឈមណ្ឌលគ្រោះ​រញ្ជួយដីចិន គ្រោះរញ្ជួយដី​កម្រិត ៦.៥រ៉ិចទ័រ បានវាយប្រហារ​លើទីក្រុង Hualien នៃកោះ តៃវ៉ាន់​នៅម៉ោង ១១៖៥០នាទីយប់ថ្ងៃអង្គារ ហើយគ្រោះ​រញ្ជួយដីនេះ​ទៀតសោត បានបង្កការ​ខូចខាតធ្ងន់ធ្ងរ​បំផុតលើ​ទីក្រុង Hualien ក្នុងរយៈ​ពេលជាង ០៥ទសវត្សរ៍​មកនេះ៕