(សេអ៊ូល)៖ ប្អូនស្រីដ៏មានឥទ្ធិពល របស់ប្រមុខដឹកនាំកំពូលផុតលេខកូរ៉េខាងជើង លោក គីម ជុងអ៊ុន ដែលទើបត្រូវបានលើកតម្កើងនៅក្នុងឆាកនយោបាយ របស់ប្រទេសកុម្មុយនិស្តមួយនេះ កាលពីឆ្នាំមុននោះ នឹងអញ្ជើញមកចូលរួម ពិធីបើកព្រឹត្តិការណ៍កីឡាអូឡាំពិករដូវរងារ ដែលនឹងប្រព្រឹត្តទៅក្នុងប្រទេសកូរ៉េខាងត្បូង នាចុងសប្តាហ៍នេះ។ នេះបើតាមការឲ្យដឹងពីទីក្រុងសេអ៊ូល ដកស្រង់ដោយទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅរសៀលថ្ងៃពុធ ទី០៧ ខែកុម្ភៈ ឆ្នាំ២០១៨។
បើគិតទាំងប្អូនស្រីរបស់ លោក គីម ជុងអ៊ុន ឈ្មោះអ្នកនាង គីម យ៉ូចុង ម្នាក់នេះទៀត គឺកូរ៉េខាងជើងបានសម្រេច នឹងបញ្ជូនមន្ត្រីជាន់ខ្ពស់របស់ខ្លួនចំនួនពីររូបហើយ ដោយក្នុងនោះ ប្រធានសភាកូរ៉េខាងជើង លោក គីម យ៉ុងណាំ កាលពីថ្ងៃម្សិលមិញនេះ ក៏ត្រូវបានសារព័ត៌មានរដ្ឋកូរ៉េខាងជើងបញ្ជាក់ផងដែរថា នឹងមកកាន់កូរ៉េខាងត្បូងដូចគ្នា ដើម្បីចូលរួមពិធីបើកសម្ពោធ ព្រឹត្តិការណ៍កីឡាអូឡាំពិក និងប៉ារ៉ាឡាំពិករដូវរងារ នៅទីក្រុងព្យឿងចាង។
យោងតាមក្រុមមន្ត្រីកូរ៉េខាងត្បូង ប្អូនស្រីលោក គីម គឺអ្នកនាង Kim Yo-jong មានតំណែងជានាយករងទីមួយ នៃនាយកដ្ឋានឃោនាការ របស់គណបក្សពលករកូរ៉េ នឹងមានឈ្មោះក្នុងចំណោម មន្ត្រីជាន់ខ្ពស់កូរ៉េខាងជើងទាំង ២២រូប ដែលដឹកនាំដោយ ប្រធានសភាកូរ៉េខាងជើង លោក គីម យ៉ុង ណាំ (Kim Yong-nam)។
ចំណែកឯ មន្ត្រីកូរ៉េខាងជើងជាន់ខ្ពស់ពីរនាក់ទៀតមាន លោក ចូ វី (Choe Hwi) ជាប្រធានគណៈកម្មាធិការកីឡាជាតិ និងលោក រី សាន់ក្វុន (Ri Son-gwon) ជាប្រធានទីភ្នាក់ងារទទួលបន្ទុកកិច្ចការអន្តរកូរ៉េ ក៏មានឈ្មោះក្នុងបញ្ជីប្រតិភូជាន់ខ្ពស់នេះដែរ ដែលនឹងត្រូវបំពេញទស្សនកិច្ច មកកាន់កូរ៉េខាងត្បូងរយៈពេលបីថ្ងៃ ដោយចាប់ផ្ដើមនៅថ្ងៃសុក្រសប្ដាហ៍នេះ។
គួរបញ្ជាក់ថា នាវាមួយគ្រឿងផ្ទុកដោយក្រុមតន្ត្រីករ, អ្នកចម្រៀង និងក្រុមអ្នករាំ របស់កូរ៉េខាងជើងជាង ១៤០នាក់ បានធ្វើដំណើរមកដល់ប្រទេសកូរ៉េខាងត្បូងហើយ កាលពីថ្ងៃអង្គារ ដើម្បីចូលរួមសម្តែងនៅក្នុង ព្រឹត្តិការណ៍កីឡាអូឡាំពិករដូវរងារនាទីក្រុង Pyeongchang នៅថ្ងៃសុក្រ ទី០៩ ខែកុម្ភៈនេះ៕
