(តៃវ៉ាន់)៖ អាជ្ញាធរតៃវ៉ាន់បានឱ្យដឹងថា មនុស្ស ០២នាក់បានស្លាប់ និងច្រើនជាង ២០០នាក់ ផ្សេងទៀត​បានរង​របួស បន្ទាប់ពីគ្រោះ រញ្ជួយដីដ៏​ខ្លាំងមួយបានវាយប្រហារ​លើទីក្រុង ហួលៀន (Hualien) នៃកោះ​តៃវ៉ាន់។ នេះបើតាម​ការចេញ​ផ្សាយ​ដោយ សារព័ត៌មាន BBC នៅព្រឹកថ្ងៃពុធ ទី០៧ ខែកុម្ភៈ ឆ្នាំ២០១៨។

យោងតាមជ្ឈមណ្ឌល​ប្រព័ន្ធរញ្ជួយដី​របស់ចិន (CENC) គ្រោះរញ្ជួយដី​កម្រិត ៦.៤រ៉ិចទ័រ បានវាយប្រហារ​ទីក្រុង Hualien នៅ​ម៉ោងប្រមាណ ២៣៖៥០នាទីយប់ កាលពី​ថ្ងៃអង្គារ ដោយមាន​ជម្រៅ ១០គីឡូម៉ែត្រ និងស្ថិតចំងាយ ២០គីឡូម៉ែត្រ ពីឆ្នេរភាគខាងកើត​កោះ​តៃវ៉ាន់។ លើសពីនេះទៅទៀត គ្រោះរញ្ជួយដីនេះ ក៏បានបង្កឱ្យសណ្ឋាគារ​មួយឈ្មោះ Marshal Hotel ដួលរលំ​ផងដែរ ខណៈមកទល់​ពេលនេះមនុស្ស ១៥០នាក់ ត្រូវ​បានជួយ​សង្រ្គោះ ចេញពី​គំនរបាក់បែក​នៃ​អាគារ។

គួរបញ្ជាក់ថា ទីក្រុង Hualien មានប្រជាជន​រស់នៅ ១០០,០០០នាក់ និងជា​គោលដៅ​​ទេសចរណ៍​​ដ៏សំខាន់។ ដោយឡែក ​បើតាម​ក្រុមមន្ត្រីតៃវ៉ាន់ សាលារៀន​ជាច្រើននឹង​នៅតែបន្តបិទទា្វរ​នៅថ្ងៃពុធនេះ រីឯក្រុមអ្នកជួយ​សង្រ្គោះនៅតែ​បន្តស្វែងរកអ្នក​ដែលគេ ជឿជាក់ជាប់​នៅក្រោមគំនរ​អគារ​ដួលរលំ៕