(សាន់ហ្រ្វាន់ស៊ីស្កូ)៖ ក្រុមហ៊ុន​អវកាសឈានមុខ​របស់សហរដ្ឋអាមេរិក Boeing បានបង្ហាញ​រូបរាងយន្តហោះ​ដឹកអ្នកដំណើរ ដែលមាន​តួខ្លួនវែង​ជាងគេបង្អស់​ធុន 737 MAX 7 នៅឯរោងចក្រ​របស់ខ្លួន ក្នុងរដ្ឋ​វ៉ាស៊ីនតោន ភាគខាងលិច​ប្រទេស។ នេះបើតាម​ការចេញ​​ផ្សាយដោយ​ទីភ្នាក់ងារព័ត៌មាន​ចិន ស៊ីនហួរ នៅរសៀលថ្ងៃអង្គារ ទី០៦ ខែកុម្ភៈ ឆ្នាំ២០១៨។

បើតាម​សេចក្តីថ្លែងការណ៍​របស់ក្រុមហ៊ុនខាងលើ MAX 7 គឺជាសមាជិក​ទីបី និងក្រោយគេ នៅក្នុងត្រកូល​យន្តហោះ 737 MAX របស់​ Boeing។ យន្តហោះម៉ូដែល​ថ្មីនេះ មានសមត្ថភាព​ផ្ទុកអ្នកដំណើរ​បានចំនួន ១៧២នាក់ ក្នុងចម្ងាយ​ហោះហើរ​ប្រហែល ៧,១៣០គី​ឡូ​ម៉ែត្រ ដែលជារយៈចម្ងាយ​ដ៏វែងបំផុត នៅក្នុងយន្តហោះ​ត្រកូល MAX។

ក្រៅពីនេះ​ក្រុមហ៊ុន Boeing បានគូសបញ្ជាក់ថា ​បើប្រៀបធៀបជា​មួយគូប្រជែង A319neo របស់​ក្រុមហ៊ុន Airbus MAX 7 អាច​ផ្ទុក​អ្នកដំណើរ​បានច្រើនជាង ១២នាក់ និងហោះហើរ​បានចម្ងាយ ៧៤១គីឡូម៉ែត្រ​ ឆ្ងាយជាង។

គួរជម្រាបថា 737 MAX 7 ត្រូវបាន​គេកំណត់​កាលវិភាគថា ចូលបម្រើការ​នៅឆ្នាំ២០១៩ ខណៈយន្តហោះ​ត្រកូល 737 MAX នេះ​​ត្រូវបាន Boeing អះអាងថា ជាយន្តហោះ​ដឹកអ្នកដំណើរ​លក់ដាច់យ៉ាង​ឆាប់បំផុត នៅក្នុង​ប្រវត្តិសាស្រ្ត​របស់ខ្លួន ដែលទទួលបាន​​ការបញ្ជាទិញ​ជាង ៤,៣០០គ្រឿង ពីអតិថិជន​ចំនួន ៩២ក្រុមហ៊ុន នៅតាមប្រទេស​ជាច្រើនជុំវិញ​ពិភពលោក៕