(សេអ៊ូល)៖ កូរ៉េខាងត្បូងនៅថ្ងៃចន្ទនេះ បានសម្ដែងការសា្វគមន៍ចំពោះកូរ៉េខាងជើង ដែលបានបញ្ជូនប្រតិភូជាន់ខ្ពស់នៃរដ្ឋាភិបាល ដឹកនាំដោយប្រធានសភាកំពូល មកចូលរួមក្នុងព្រឹត្តិការណ៍កីឡាអូឡាំពិករដូវរងារ រៀបចំឡើងនៅលើទឹកដីកូរ៉េខាងត្បូង នៅក្នុងសប្ដាហ៍នេះ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃចន្ទ ទី០៥ ខែកុម្ភៈ ឆ្នាំ២០១៨។
ថ្លែងនៅក្នុងសន្និសីទសារព័ត៌មានដ៏ខ្លីមួយ អ្នកនាំពាក្យក្រសួងបង្រួបបង្រួមជាតិកូរ៉េខាងត្បូង លោក ប៊ែក តែយុន (Baik Tae-hyun) បានឱ្យ ដឹងថា រដ្ឋាភិបាលទីក្រុងសេអ៊ូលស្វាគមន៍ចំពោះដំណើរទស្សនកិច្ច របស់ប្រធានសភាជាន់ខ្ពស់កូរ៉េខាងជើង លោក គីម យ៉ុងណាំ (Kim Yong-nam) មកកាន់កូរ៉េខាងត្បូង ដោយថែមទាំងបញ្ជាក់ទៀតថា នឹងជួយផ្ដល់ការស្នាក់នៅ និងធានាការពារសុវត្ថិភាព នៅអំឡុងពេលស្នាក់របស់ក្រុមប្រតិភូកូរ៉េខាងជើង។
គួរបញ្ជាក់ដែរថា បើតាមទីភ្នាក់ងារព័ត៌មានរដ្ឋកូរ៉េខាងជើង KCNA គណៈប្រតិភូជាន់ខ្ពស់កូរ៉េខាងជើងមួយក្រុម ដឹកនាំដោយ លោក Kim Yong Nam នឹងចេញដំណើរទៅកាន់ប្រទេសកូរ៉េខាងត្បូង នាពេលឆាប់ៗនេះ ដើម្បីចូលរួមពិធីបើកការប្រកួតកីឡាអូឡាំពិករដូវរងារលើកទី ២៣។ ព្រឹត្តិការណ៍កីឡានេះ នឹងប្រព្រឹត្តទៅពីថ្ងៃទី០៩ ដល់ទី២៥ ខែកុម្ភៈ នៅឯទីក្រុងព្យឿងចាង (PyeongChang) ប្រទេសកូរ៉េខាងត្បូង៕
