(ប៉េកាំង)៖ ផ្កាយរណប​ផ្នែកសិក្សាស្រាវជ្រាវ​ដំបូងរបស់​ចិន​ ឈ្មោះ Young Pioneer 1 ត្រូវបានបាញ់​បង្ហោះហើយ​ តាមរយៈគ្រាប់​រ៉ុក្កែត Long March-2D ចេញពីមជ្ឈមណ្ឌល​បាញ់​ផ្កាយរណប Jiuquan នៅរសៀល​ថ្ងៃសុក្រនេះ។ នេះបើ​តាមការ ចេញផ្សាយ​ដោយ ទីភ្នាក់ងារ​សារព័ត៌មាន​ចិន ស៊ីនហួរ នៅល្ងាចថ្ងៃសុក្រ ទី០២ ខែកុម្ភៈ​​ ឆ្នាំ២០១៨។

ជាប្រភេទ​ផ្កាយរណបខ្នាតតូច​ មានទម្ងន់ ០៣គីឡូក្រាម Young Pioneer 1 បានចូល​ទៅក្នុងគន្លង​តារាវិថី នៅរយៈកម្ពស់ ៥០២គីឡូម៉ែត្រ ពីលើពិភព​ផែនដី។ គ្រាប់​រ៉ុក្កែត Long March-2D ក៏បាននាំយក​ទៅជាមួយ​ផងដែរ Zhangheng 1​ ដែល​ជាផ្កាយ​រណបខ្នាតតូច​ សម្រាប់ការសិក្សា​ពីទិន្នន័យ​គ្រោះរញ្ជួយដី រួមទាំងផ្កាយរណប​ខ្នាតចំនួន ០៥គ្រឿង ផ្សេងទៀត។

លើសពីនេះទៅ​ទៀត CEO ក្រុមហ៊ុន Commsat លោក Xie Tao ក៏បាន​បញ្ជាក់ដែរថា ផ្កាយរណបទាំងនេះនឹងដំណើរការណ៍ររក្សាទុក បណ្ដាញអិនធឺណែតឥតខ្សែ ក៏ដូចជាបញ្ជូនរលកវិទ្យុតាមប្រេកង់កាំរស្មី UV, រូបភាពលំហរអាកាស និងផ្ទៀងផ្ទាត់អ្នក ប្រើប្រាស់ (user links) ទៅកាន់ប្រព័ន្ធអ៊ីនធឺណែត។

គួរបញ្ជាក់ថា ផ្កាយ​រណប Young Pioneer 1 ត្រូវបាន​ផលិត និងធ្វើតេស្ដ​សាកល្បង​ដោយ​ក្រុមហ៊ុន Commsat ដែលជា​ក្រុមហ៊ុនឯកជន​មួយ​ជំនាញខាង​ផ្កាយរណប និងមានមូលដ្ឋាន​នៅក្នុងទីក្រុង​ប៉េកាំង។ ក្រុមហ៊ុននេះ​បានទទួល​មូលនិធិ ពី​​វិទ្យាស្ថាន Xi'an Institute of Optics and Precision Mechanics ក្រោមគ្រប់គ្រង​របស់រាជបណ្ឌិត​សភា​វិទ្យាសាស្ត្រចិន៕