(ស៊ីរី)៖ ការផ្គត់ផ្គង់នៅក្នុងមន្ទីរពេទ្យនៅឯទីក្រុង Afrin នៃភាគខាងជើងប្រទេសស៊ីរី កាន់តែធ្លាក់ចុះជាលំដាប់ ខណៈនៅលើគ្រែពេញដោយអ្នករងរបួស ប្រឡាក់ឈាមពេញខ្លួន បន្ទាប់ពីពួកគេរត់គេចចេញពី ការវាយប្រហាររបស់កងកម្លាំងតួកគី នៅក្នុងប្រតិបត្តិការបោសសំអាត ពួកសកម្មប្រយុទ្ធឃើដ YPG។ នេះបើតាមការចេញផ្សាយដោយ សារព័ត៌មាន Russian Today នៅរសៀលថ្ងៃសុក្រ ទី០២ ខែកុម្ភៈ ឆ្នាំ២០១៨។
វីដេអូនៅកន្លែងកើតហេតុ បានបង្ហាញពីឈាមប្រឡាក់ពេញឥដ្ឋមន្ទីរពេទ្យ ត្រូវបានគេជូតសំអាត រីឯសាច់ញាតិជនរង គ្រោះជាច្រើននាក់ បានទួញសោកត្រហូរយំគួរឱ្យសង្វេគ។ ជាមួយគ្នានោះដែរ ថ្លែងនៅក្នុងបទសម្ភាសន៍ជាមួយ Russian Today បុរសម្នាក់ដែលប្រឡាក់ឈាមពេញមុខ បាននិយាយថា «យើងបានចាកចេញពីតំបន់ Raju នៅពេលយន្ដហោះ ចម្បាំងមួយគ្រឿងចាប់ផ្ដើមវាយប្រហារមកលើពួកយើង ហើយមិនតែប៉ុណ្ណោះវា ក៏បានវាយប្រហារជាច្រើនលើកមកលើពួកយើងផងដែរ នៅពេលខ្ញុំកំពុងស្ថិតនៅជាមួយបងប្អូនប្រុសខ្ញុំ និងគ្រួសាររបស់គាត់ ... ដូច្នេះអ្វីដែលខ្ញុំចង់បានគឺសូមឱ្យ អន្តរជាតិធ្វើអ្វីម្យ៉ាង ដើម្បីបញ្ឈប់ការវាយប្រហារភេរវកម្មរបស់តួកគី ប្រឆាំងនឹងជនស៊ីវិល»។
គួរបញ្ជាក់ថា តួកគីបានបើកប្រតិបត្តិការយោធា កាលពីខែមករា វាយលុកលើទីក្រុង Afrin នៅក្នុងប្រទេសស៊ីរីសំដៅ បោសសំអាតពួកសកម្មប្រយុទ្ធឃើដ YPG គំាទ្រដោយសហរដ្ឋអាមេរិក។ ការវាយប្រហារប៉ុន្មានសប្ដាហ៍មកនេះ បានផ្ដាច់យកអាយុជីវិតក្រុមសកម្មប្រយុទ្ធរាប់សិបនាក់ ហើយសង្រ្គាមនេះបានរីករាលដាលដល់ព្រំដែនអ៊ីរ៉ាក់ ជាក់ស្ដែងកាលពីថ្ងៃព្រហស្បតិ៍ ទីក្រុងអង់ការ៉ាបានអះអាងថា ខ្លួនបានសម្លាប់ក្រុមសកម្មប្រយុទ្ធឃើដ ៤៥នាក់ នៅតំបន់ជាច្រើននៅអ៊ីរ៉ាក់៕
