(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ បានប្រកាស​ពីបញ្ជីឈ្មោះ​ នៃក្រុមមន្រ្តី​ដែលនឹងអញ្ជើញ​ទៅចូលរួម​ក្នុង​ពិធីបើកក៏ដូច​ជាព្រឹត្តិការណ៍ប្រកួតអូឡាំពិក​រដូវរងារ នៅទីក្រុងព្យុងចាង (PyeongChang) ឆ្នាំ២០១៨ នៅឯប្រទេស​កូរ៉េខាងត្បូង ដោយក្នុងនោះ លោក​នឹងមិនបានទៅ​ដោយផ្ទាល់នោះ​ឡើយ។ នេះបើតាម​ការ​​ចេញផ្សាយ​ដោយ ទីភ្នាក់ងារព័ត៌មានចិន ស៊ីនហួរ នៅព្រឹក​ថ្ងៃសុក្រ ទី០២ ខែកុម្ភៈ ឆ្នាំ២០១៨។

បើតាមសេចក្តីថ្លែងការណ៍​របស់សេតវិមាន អនុប្រធានាធិបតី​អាមេរិក លោក ម៉ៃក៍ ភែន (Mike Pence) នឹងជាអ្នកដឹកនាំ​គណៈប្រតិភូជា​មួយ​ភរិយារបស់​លោក គឺលោកស្រី ការែស ភែន (Karen Pence) ដែលជាសមាជិកម្នាក់ដែរ នៅក្នុងក្រុមមន្រ្តីជំនួសមុខឲ្យលោក ដូណាល់ ត្រាំ នេះ។

គួរជម្រាបថា ព្រឹត្តិការណ៍ប្រកួត​កីឡាអន្តរជាតិនេះ ត្រូវគ្រោងនឹង​ចាប់ផ្តើមប្រព្រឹត្ត​ទៅ ចាប់ពី​ថ្ងៃទី០៩ ដល់​ថ្ងៃទី២៥ ខែកុម្ភៈ៕