(កាប៊ុល)៖ គ្រោះធម្មជាតិ​រញ្ជួយផែនដី​កម្រិត ៦.១រ៉ិចទ័រ បានវាយប្រហារ​ភាគខាងជើង​​រដ្ឋធានី​កាប៊ុល នៃប្រទេស​​អាហ្វហ្គានីស្ថាន​ ជាប់ព្រំដែនប្រទេស តាជីគីស្ថាន បានបណ្ដាលឱ្យក្មេងម្នាក់​ស្លាប់ និងមនុស្ស ០៩នាក់​ទៀត​រងរបួស នៅប្រទេសប៉ាគីស្ថាន ដែលរងឥទ្ធិពលខ្លាំង​ពីអាហ្វហ្គានីស្ថាន​នោះ។ នេះបើតាម​ការចេញ​ផ្សាយ​នៅមុននេះបន្តិច ដោយបណ្តាញ​​ព័ត៌មាន Hindustan Times នារសៀល​ថ្ងៃពុធ ទី៣១ ខែមករា ឆ្នាំ២០១៨។

ទីភ្នាក់ងារស្ទាបស្ទង់​ភូមិសាស្ត្រ​អាមេរិក បានបង្ហាញ​ទិន្នន័យ​ជាបឋមឲ្យ​ដឹងថា គ្រោះរញ្ជួយដីនេះ បានបង្ករំញ័រ​​ទៅដល់​រដ្ឋធានីញូដេលី​ នៃប្រទេស​ឥណ្ឌា និងអ៊ីស្លាម៉ាបាដ​របស់​ប៉ាគីស្ថាន ដែលស្ថិតនៅក្បែរ​ខាង​​​ប្រទេសអាហ្វហ្គានីស្ថាន​​ផងដែរ។
គ្រោះរញ្ជួយដីនេះ​បានកើតឡើង​នៅតំបន់ភ្នំ Hindu Kush ពីក្នុងជម្រៅដី ១៩១គីឡូម៉ែត្រ។
ដោយឡែក បើតាម​អាជា្ញធរប៉ាគីស្ថាន គ្រោះរញ្ជួយដីនេះ​បានបណ្ដាលឱ្យក្មេង​ស្រីម្នាក់​បាត់បង់ជីវិត និងមនុស្ស ០៩នាក់ទៀត ជាសាច់ញាតិ​របស់នាង​បានរងរបួសនៅក្នុងខេត្ត បាឡូជីស្ថាន (Balochistan) ក្រោយផ្ទះ​របស់ពួកគេ​រលំសង្កត់។

គួរបញ្ជាក់ថា ប្រជាជនមួយ​ចំនួន បានចេញមក​តាមដងផ្លូវ និងទីវាលដើម្បីសុវត្ថិភាព ខណៈរំញ័រនេះ​បានជះឥទ្ធិពលខ្លាំង​ទៅដល់ ​តំបន់មួយចំនួនក្នុងប្រទេសឥណ្ឌា​ដូចជា ញូដេលី ហ្សាមមូ កាស្មៀ និងរ៉ាហ្សាស្ថានជាដើម៕