(កាប៊ុល)៖ គ្រោះធម្មជាតិរញ្ជួយផែនដីកម្រិត ៦.១រ៉ិចទ័រ បានវាយប្រហារភាគខាងជើង​រដ្ឋធានី​កាប៊ុល នៃប្រទេស​អាហ្វហ្គានីស្ថាន ជាប់ព្រំដែនប្រទេសតាជីគីស្ថាន នៅមុននេះ​បន្តិច ប៉ុន្តែមិនទាន់មាន​ការបញ្ជាក់ថា មានមនុស្ស​រងគ្រោះ ឬក៏ការខូចខាត​ទ្រព្យសម្បត្តិ​ជារួម​ក្នុងកម្រិតណានោះឡើយ។ នេះបើតាមការចេញ​ផ្សាយនៅមុននេះបន្តិច ដោយបណ្តាញ​ព័ត៌មាន Hindustan Times នារសៀលថ្ងៃពុធ ទី៣១ ខែមករា ឆ្នាំ២០១៨។

ទីភ្នាក់ងារស្ទាបស្ទង់ភូមិសាស្ត្រអាមេរិក បានបង្ហាញ​ទិន្នន័យជាបឋមឲ្យ​ដឹងថា គ្រោះរញ្ជួយដីនេះ បានបង្ករំញ័រ​ទៅដល់​រដ្ឋធានីញូដេលី​ នៃប្រទេស​ឥណ្ឌា និងអ៊ីស្លាម៉ាបាដ​របស់ប៉ាគីស្ថាន ដែលស្ថិតនៅក្បែរខាង​​ប្រទេសអាហ្វហ្គានីស្ថាន​ផងដែរ។ រញ្ជួយដីនេះ បានកើតឡើង​នៅតំបន់ភ្នំ Hindu Kush ពីក្នុងជម្រៅដី ១៩១គីឡូម៉ែត្រ។

គួរបញ្ជាក់ថា ប្រជាជន មួយចំនួន បានចេញមក​តាមដងផ្លូវ និងទីវាលដើម្បីសុវត្ថិភាព ខណៈរំញ័រនេះ​បានជះឥទ្ធិពលខ្លាំង​ទៅដល់ ​តំបន់មួយចំនួនក្នុងប្រទេសឥណ្ឌា​ដូចជា ញូដេលី ហ្សាមមូ កាស្មៀ និងរ៉ាហ្សាស្ថានជាដើម៕