(ម៉ានីល)៖ ក្រុមប្រឹក្សាក្រុងក្វេហ្សន (Quezon) នៅក្នុងរដ្ឋធានីម៉ានីល នៃប្រទេសហ្វីលីពីន បានចេញសេចក្តីបង្គាប់មួយ ដែលហាមមិនឲ្យប្រជាជនខ្លួន «ដើរអាក្រាតកាយពាសវាលពាសកាល នៅតាមទីកន្លែងសាធារណៈជាដាច់ខាត» មិនថាអាក្រាតតែមួយល្វែងលើ មួយល្វែងក្រោម ឬក៏អត់សម្លៀកបំពាក់បិទបាំងមួយតួខ្លួនតែម្តងនោះឡើយ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃពុធ ទី៣១ ខែមករា ឆ្នាំ២០១៨។
បទបញ្ជាខាងលើ ដែលតាក់តែងដោយប្រធានក្រុមប្រឹក្សាក្រុង លោក រ៉ានូលហ្វូ លូដូវីកា (Ranulfo Ludovica) គឺឈរទៅលើបែបបទ និងឥរិយាបថក្នុងសង្គម ដែលអាចទទួលយកបាន ហើយមានសីលធម៌ត្រឹមត្រូវ និងសមរម្យ។ បទបញ្ជានេះ នឹងកំណត់ការផាកពិន័យជាប្រាក់ចំនួន ១,០០០ប៉េសូ (ស្មើ ១៩ដុល្លារ) ឬក៏ឲ្យបម្រើសេវាផ្សេងៗ ដែលបម្រើផលប្រយោជន៍ដល់សហគមន៍ នៅក្នុងភូមិរយៈពេល ០៣ថ្ងៃ សម្រាប់ជនដែលល្មើសបម្រាមជាលើកដំបូង, ចំនួន ១,៥០០ប៉េសូ (២៩ដុល្លារ) ឬក៏ត្រូវបម្រើសេវាសង្គម ០៥ថ្ងៃ សម្រាប់ការបំពានលើបទបម្រាមជាលើកទីពីរ ហើយនិងចំនួន ៣,០០០ប៉េសូ (៥៨ដុល្លារ) ឬត្រូវជាប់ពន្ធនាគាររយៈពេល ០៦ខែ សម្រាប់អ្នករំលោភលើបម្រាមជាលើកទីបី។
គួរជម្រាបថា សម្រាប់អ្នកដែល ត្រូវគេប្រទះឃើញបំពានច្បាប់ថ្មីនេះ ជាលើកទីបួន និងលើកក្រោយៗទៀត ជននោះនឹងត្រូវឃាត់ខ្លួន ហើយពិន័យជាប្រាក់ ៥,០០០ប៉េសូ (៩៧ដុល្លារ)។ ដោយឡែក សម្រាប់បុគ្គលដែលមានបញ្ហាក៏ដូចជាជំងឺផ្នែកសតិអារម្មណ៍ ដែលបានល្មើសច្បាប់វិញ នឹងត្រូវឃាត់ខ្លួន ប៉ុន្តែពុំត្រូវបង្ខំឲ្យបង់ប្រាក់ពិន័យឡើយ៕
(ម៉ានីល)៖ ក្រុមប្រឹក្សាក្រុងក្វេហ្សន (Quezon) នៅក្នុងរដ្ឋធានីម៉ានីល នៃប្រទេសហ្វីលីពីន បានចេញសេចក្តីបង្គាប់មួយ ដែលហាមមិនឲ្យប្រជាជនខ្លួន
