(វ៉ាស៊ីនតោន)៖ ផែនការរបស់តួកគី ក្នុងការទិញយកប្រព័ន្ធខែលការពារមីស៊ីល S-400 ពីប្រទេសរុស្ស៊ី អាចនឹងបង្ខំឲ្យសហរដ្ឋអាមេរិកដាក់ទណ្ឌកម្ម ប្រឆាំងនឹងទីក្រុងអង់ការ៉ា។ នេះបើតាមសេចក្តីរាយការណ៍ថ្មីមួយ ស្តីពីទំនាក់ទំនងរបស់ទីក្រុងវ៉ាស៊ីនតោន ជាមួយអង់ការ៉ា។ នេះបើតាមការចេញផ្សាយដោយ សារព័ត៌មានរុស្ស៊ី Sputnik នៅព្រឹកថ្ងៃអង្គារ ទី៣០ ខែមករា ឆ្នាំ២០១៨។
របាយការណ៍ខាងលើបានលើកឡើងដូច្នេះថា «សព្វថ្ងៃមានការព្រួយបារម្ភថា កិច្ចព្រមព្រៀងសព្វាវុធតួកគី-រុស្ស៊ី អាចនឹងបង្កឲ្យមានទណ្ឌកម្មពីអាមេរិក នៅឆ្នាំ២០១៨នេះ ក្រោមច្បាប់ដែលចែងពីការទប់ទល់នឹងគូសត្រូវរបស់អាមេរិក តាមរយៈការប្រើប្រាស់ទណ្ឌកម្មហៅកាត់ថា CAATSA ដែលបានចូលជាធរមានកាលពីខែសីហា ឆ្នាំ២០១៧»។
ក្រៅពីនេះ គម្រោងបង្កើតប្រព័ន្ធបំពង់ផ្គត់ផ្គង់ឧស្ម័នរវាងទីក្រុងម៉ូស្គូ និងអង់ការ៉ា នឹងបណ្តាលឲ្យតួកគី កាន់តែពឹងផ្អែកទៅលើរុស្ស៊ីថែមទៀត សម្រាប់ការផ្តល់ថាមពលឧស្ម័ន ហើយក៏នឹងប្រថុយប្រថាន ក្នុងការបង្កឲ្យមានការដាក់ទណ្ឌកម្មសងសឹកពីអាមេរិកផងដែរ។
គួរជម្រាបថា ការបន្តគាំទ្ររបស់អាមេរិក ចំពោះក្រុមប្រដាប់អាវុធឃើដ YPG ដែលធ្វើសកម្មភាពនៅភាគខាងជើងប្រទេសស៊ីរី ដែលតួកគីកំពុងបន្តធ្វើប្រតិបត្តិការយោធាទ្រង់ទ្រង់ធំ ដើម្បីកម្ទេចចោលនោះ បានបង្ហាញយ៉ាងច្បាស់ថា ទីក្រុងវ៉ាស៊ីនតោន និងទីក្រុងអង់ការ៉ា នឹងត្រូវប្រឈមមុខភាពតានតឹងបន្តទៀត នៅក្នុងឆ្នាំនេះ៕
