(វ៉ាស៊ីនតោន)៖ កងកម្លាំងសន្តិសុខអ៊ីរ៉ាក់ យ៉ាងហោចណាស់១១នាក់ ត្រូវបានសម្លាប់នៅក្នុងការវាយប្រហារតាមផ្លូវអាកាសរបស់ក្រុមចំរុះអន្តរជាតិដឹកនាំដោយសហរដ្ឋអាមេរិក នៅក្បែរមូលដ្ឋានទ័ពអាកាសអាមេរិកមួយកន្លែង នៅក្នុងប្រទេសអ៉ីរ៉ាក់ ហើយបើតាមក្រុមមន្ត្រីអ៉ីរ៉ាក់ ជនរងគ្រោះទាំងអស់ត្រូវគេច្រឡំថា ជាក្រុមសកម្មប្រយុទ្ធ។ នេះបើតាមការចេញ ផ្សាយដោយសារព័ត៌មាន Russian Today​ នៅថ្ងៃអាទិត្យ ទី២៨ ខែមករា ឆ្នាំ២០១៨។

យោងតាមអាជ្ញាធរអ៉ីរ៉ាក់ ការវាយប្រហារខាងលើបានកើតឡើងនៅក្នុងទីក្រុង Baghdadi​ ស្ថិតនៅចំងាយ១៧០គីឡូម៉ែត្រ ភាគពាយព្យនៃរដ្ឋាបាកដាដ។ ទីក្រុង Baghdadi​ គឺជាកន្លែងឈរជើងនៃមូលដ្ឋានទ័ពអាកាស Al Asad ប្រតិបត្តិការដោយកងទ័ពអាមេរិក និងអ៊ីរ៉ាក់។ ប៉ុន្តែទន្ទឹមគ្នានោះដែរ មានសេចក្ដីរាយការណ៍ផ្សេងៗពីគ្នា ពាក់ព័ន្ធនឹង ជនរងគ្រោះ ពោលគឺបើតាមទីភ្នាក់ងារសារព័ត៌មាន Reuters កងកម្លាំងសន្តិសុខអ៊ីរ៉ាក់១០នាក់ និងមន្ត្រីអ៊ីរ៉ាក់ក្នុងតំបន់ម្នាក់បានស្លាប់។ ចំណែកឯទីភ្នាក់ងារសារព័ត៌មានបារាំង AFP ផ្អែកលើប្រភពពីមន្ត្រីអ៊ីរ៉ាក់ ក៏បានរាយការណ៍ដែរថាមនុស្ស០៨នាក់ ក្នុងនោះមានមន្ត្រីជាន់ខ្ពស់ស៊ើបការសំងាត់អ៊ីរ៉ាក់ម្នាក់ ប៉ូលិល០៥នាក់ និងស្ត្រីម្នាក់​ ត្រូវបានសម្លាប់ រីឯ ២០នាក់រងរបួសនៅក្នុងការវាយប្រហារតាមផ្លូវការរបស់ក្រុមចំរុះអាមេរិក។

គួររំលឹកថា កាលពីខែកក្កដា ឆ្នាំ២០១៧ អង្គការលើកលែងទោសអន្តរជាតិ (Amnesty International) បាននិយាយថា កងកម្លាំងអ៊ីរ៉ាក់ និងក្រុមចំរុះអន្តរជាតិរបស់អាមេរិក បាន បរាជ័យក្នុងការចាត់វិធានការពារជនស៊ីវិល ហើយប្រើប្រាស់ការវាយប្រហារតាមផ្លូវអាកាសហួសប្រមាណទៅលើក្រុមសកម្មប្រយុទ្ធ ISIS និងពេលខ្លះត្រូវចំលើកងកម្លាំងសម្ព័ន្ធមិត្ត ឬជនស៊ីវិលផងដែរ៕