(ម៉ូស្គូ)៖ កូរ៉េខាងជើងបានដឹកជញ្ជូនធ្យូងថ្ម តាមនាវាទៅកាន់ប្រទេសរុស្ស៊ីកាលពីឆ្នាំ២០១៧ មុននឹងត្រូវដឹកបញ្ជូនទៅឱ្យប្រទេសកូរ៉េខាងត្បូង និងជប៉ុន ហើយដែលនេះអាចជាការ រំលោភលើដំណោះស្រាយដាក់ទណ្ឌកម្ម នៃអង្គការសហប្រជាជាតិ (UN)។ នេះបើតាមប្រភពពី ទីភ្នាក់ងារស៊ើបការណ៍សម្ងាត់អឺរ៉ុបខាងលិច ដែលត្រូវបានទម្លាយ និងដកស្រង់ដោយទីភ្នាក់ងារសារព័ត៌មាន Reuters នៅល្ងាចថ្ងៃសុក្រ ទី២៦ ខែមករា ឆ្នាំ២០១៨។
ក្រុមប្រឹក្សាសន្តិសុខយូអិន បានហាមឃាត់លើការនាំចេញធ្យូងថ្មរបស់កូរ៉េខាងជើង កាលពីថ្ងៃទី០៥ ខែសីហា ឆ្នាំ២០១៧ ក្រោមក្របខណ្ឌនៃការអនុវត្តការដាក់ទណ្ឌកម្ម មានបំណង កាត់ផ្ដាច់ប្រភពប្រាក់ចំណូលពីបរទេស ដែលទីក្រុងព្យុងយ៉ាង ត្រូវការជាចាំបាច់ ដើម្បីផ្គត់ផ្គង់ដល់ការអភិវឌ្ឍកម្មវិធីនុយក្លេអ៊ែរ និងមីស៊ីលឆ្លងទ្វីប។
ទោះជាយ៉ាងនេះក្ដី ទីភ្នាក់ងារសារព័ត៌មាន Reuters ផ្អែកលើប្រភពពីទីភ្នាក់ងារស៊ើបការណ៍សំងាត់អឺរ៉ុខាងលិច បានឱ្យដឹងថា របបដឹកនាំកុម្មុយនីស្ដក្រុងព្យុងយ៉ាង នៅតែអាចដឹកជញ្ជូនធ្យូងថ្ម រហូតដល់ទៅបីដង ទៅកាន់កំពង់ផែរុស្ស៊ី Nakhodka និង Kholmsk ជាទីដែលធ្យូថ្មរាប់តោនត្រូវគេបានទម្លាក់ចុះ និងលើកឡើងដាក់លើនាវាវិញ ដើម្បីបញ្ជូនបន្តទៅកាន់ប្រទេសជប៉ុន និងកូរ៉េខាងត្បូង។
គួរបញ្ជាក់ថា បើតាមប្រភពខាងលើដដែល នាវាដឹកធ្យូងថ្មកូរ៉េខាងជើងបានទៅដល់ប្រទេសជប៉ុន និងកូរ៉េខាងត្បូងកាលពីខែតុលា ឆ្នាំ២០១៧ រីឯមន្ត្រីសន្តិសុខអាមេរិកម្នាក់ ក៏បានទទួលស្គាល់ដែរថា ពិតជាការធ្វើពាណិជ្ជកម្មធ្យូង តាមរយៈប្រទេសរុស្ស៊ីប្រាកដមែន ហើយថាវានៅតែបន្តកើតមាន៕
https://s1.reutersmedia.net/resources/r/?m=02&d=20180125&t=2&i=1225291844&r=LYNXMPEE0O1Q2&w=1280
