(អ៊ីតាលី)៖ មនុស្សយ៉ាង​ហោចណាស់ ០២នាក់ស្លាប់ និង ១០នាក់ផ្សេងទៀត ត្រូវបានបញ្ជូន​ទៅកាន់មន្ទីរពេទ្យ ក្រោម​ស្ថានភាព​រងរបួសធ្ងន់ធ្ងរ បន្ទាប់ពីរថភ្លើង​ដែលពួកគេ​ជិះ បានរអិលធ្លាក់ផ្លូវ​នៅក្បែរ​ទីក្រុង Milan​ ប្រទេស​អ៊ីតាលី។ នេះបើតា​មប្រភពពីក្រុមហ៊ុន Trenord railway company ដកស្រង់​ដោយសារព័ត៌មាន Sputnik នៅរសៀលថ្ងៃព្រហស្បតិ៍ ទី២៥ ខែមករា ឆ្នាំ២០១៨។

យោងតាម ក្រុមហ៊ុន Trenord railway company រថភ្លើងខាង​លើមានគោលដៅ​ធ្វើដំណើរ​ពីទីក្រុង Cremona ទៅកាន់​ទីក្រុង Milan បានរអិលធ្លាក់ផ្លូវ​នៅតំបន់​ស្ថិតនៅចន្លោះ ទីក្រុង Milan និងទីក្រុង Venice នៅព្រឹក​ថ្ងៃព្រហស្បតិ៍នេះ (ម៉ោងនៅទីក្រុងរ៉ូម)។​

គួរបញ្ជាក់ថា ភ្លាមៗពុំទាន់មាន​ការបញ្ជាក់​ពីមូលហេតុ នៃគ្រោះថ្នាក់​នេះនៅ​ឡើយទេ ខណៈអាជ្ញាធរ​អ៊ីតាលីបាន​ផ្អាកសេវាកម្ម ផ្លូវដែក​ជាបណ្ដោះ​អាសន្ន។ បើតាមប្រព័ន្ធ​ផ្សព្វផ្សាយនៅ​ក្នុងស្រុក អ្នកដំណើរ ១០០នាក់ ក៏បានរងរបួស​ស្រាល​ផងដែរ៕