(ប៉េកាំង)៖ ក្រុមអ្នកបុរាណវិទ្យាចិន មកពីវិទ្យាស្ថាន Shenyang នៅថ្ងៃពុធនេះបានឱ្យដឹងថា ទីតាំងផ្នូរបុរាណចំនួនពីរ មានអាយុកាលជាង ១,០០០ឆ្នាំមុន ត្រូវបានគេរកឃើញនៅ ក្នុងខេត្ត Liaoning នៃភាគឦសានប្រទេសចិន។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅរសៀលថ្ងៃពុធ ទី២៤ ខែមករា ឆ្នាំ២០១៨។
យោងតាមវិទ្យាស្ថាន Shenyang ផ្នូរក្នុងរាជវង្ស Liao (៩១៦-១១២៥) ត្រូវបានគេរកឃើញ នៅឯទីតាំងវប្បធម៌បុរាណ ក្នុងតំបន់ជនបទ Kangping County ស្ថិតទីក្រុង Shenyang បន្ទាប់ពីការចាប់ផ្ដើមការរុករក កាលពីខែមេសា ឆ្នាំ២០១៧មក។ វិទ្យាស្ថានមួយនេះ បានបញ្ជាក់ទៀតថា ពួកគេក៏បានរកឃើញវត្ថុបុរាណជិត ៥០០មុខផងដែរ ក្នុងនោះរួម មានទាំងបំណែកព័រសឺឡែនចំនួន ២០ នៅសម័យរាជវង្សសុង (៩៦០-១២៧៩)។
គួរបញ្ជាក់ថា បើតាមវិទ្យាស្ថាន Shenyang របកគំហើញនេះគឺមានសារៈសំខាន់បំផុតសម្រាប់ការសិក្សាស្រាវជ្រាវពីរបៀបបញ្ចុះសពនៃពួកអភិជន Khitan សម័យរាជវង្ស Lioa ដែលបង្កើតឡើងដោយជនជាតិ Khitan និងបានគ្រប់គ្រងតំបន់មួយផ្នែកនៃភាគឦសានប្រទេសចិន៕
