(ស៊ីដនី)៖ ជើងហោះហើរមួយគ្រឿង របស់ក្រុមហ៊ុនអាកាសចរណ៍ Malaysian Airlines ដែលហោះហើរចេញទីក្រុង Sydney ប្រទេសអូស្ត្រាលី ទៅកាន់ ទីក្រុង Kuala Lumpur ប្រទេសម៉ាឡេស៊ី បានបង្ខំចិត្តចុះចតជាបន្ទាន់ នៅទីប្រជុំជន Alice Springs ប្រទេសអូស្ត្រាលី នាថ្ងៃព្រហស្បត្តិ៍នេះ, នេះបើយោងតាមសារព័ត៌មាន Channel News Asia ចុះផ្សាយឲ្យដឹងនៅយប់ថ្ងៃទី១៨ ខែមករា​ ឆ្នាំ២០១៨នេះ។

​ជើងហោះហើរលេខ MH122 ដែលផ្ទុកដោយអ្នកធ្វើដំណើរ ចំនួន២២៤នាក់ជិះនៅលើនោះ បានបង្វែរការហោះហើររបស់ខ្លួន ទៅចុះចតនៅទីប្រជុំជន Alice Springs បន្ទាប់ពីម៉ាស៊ីនមួយ ក្នុងចំណោមម៉ាស៊ីន២ របស់យន្តហោះ បានចាប់ផ្តើមមានសភាពមិនស្រួល (មានបញ្ហា)។

ទោះយ៉ាងណាក្តី អ្នកបើកបរ បានចុះចតយន្តហោះប្រភេទ A330-300 នេះ ប្រកបដោយសុវត្ថិភាព បើទោះបីជាមានម៉ាស៊ីនតែមួយនៅដំណើរការក្តី។

ក្រុមហ៊ុន Malaysia Airlines បានឲ្យដឹងតាមសេចក្តីថ្លែងការណ៍មួយ នៅថ្ងៃព្រហស្បត្តិ៍នេះថា ជើងហោះហើរលេខ MH122 បានបង្វែរទិសដៅ ទៅរកកន្លែងចុះចត ដោយសារមានបញ្ហាបច្ចេកទេស៕​