(សេអ៊ូល)៖ រដ្ឋមន្ត្រីការបរទេស​កូរ៉េខាងត្បូង លោកស្រី Kang Kyung-wha បាននិយាយថា កូរ៉េខាងត្បូង​នឹងបន្តធ្វើកិច្ចចរចា​កម្រិតខ្ពស់​ជាមួយកូរ៉េខាងជើង​ ក្រោមការឃ្លាំ​មើលយ៉ាង យកចិត្តទុកដាក់ ខណៈមានការ​ព្រមានជាច្រើនពី​អន្តរជាតិថា ទីក្រុងព្យុងយ៉ាង​ទំនងជាកំពុង​​ប្រើប្រាស់កិច្ចចរចា​ ដើម្បីបន្តការអភិវឌ្ឍ ឬធ្វើតេស្ដ​អាវុធនុយក្លេអ៊ែរ​របស់ខ្លួន។ នេះបើ​តាមការចេញ​ផ្សាយដោយ​សារព័ត៌មាន BBC នៅព្រឹកថ្ងៃព្រហស្បតិ៍ ទី១៨ ខែមករា​ ឆ្នាំ២០១៨។

ការលើក​ឡើងបែបនេះ របស់​លោកស្រី Kang កើតមាន​ឡើងក្រោយ រដ្ឋមន្ត្រីការ​បរទេសជប៉ុន លោក Taro Kono កាលពី​ថ្ងៃពុធម្សិលមិញ បានកត់សម្គាល់​ថា ពិភពលោក​មិនគួរ ធ្វេសប្រហែស​ចំពោះកូរ៉េខាងជើង​នោះទេ។ «នេះមិនមែន​ជាពេលត្រូវបន្ធូរបន្ថយ​ការដាក់សម្ពាធ ឬលើកទឹកចិត្ត​កូរ៉េខាងជើង​ឡើយ ដ្បិតជាការពិតណាស់ ការដែល​កូរ៉េខាងជើង​កំពុងចូលរួមក្នុង​កិច្ចសន្ទនា គឺបានបង្ហាញថាការ​ដាក់ទណ្ឌកម្មកំពុង​ដំណើរការ»។ នេះជាការ​លើកឡើងរបស់ ​លោករដ្ឋមន្ត្រីការបរទេសជប៉ុន។

យ៉ាងណាក៏​ដោយ ថ្លែងនៅក្នុង​បទសម្ភាសន៍​ជាមួយ BBC ចេញផ្សាយនៅ​ថ្ងៃព្រហស្បតិ៍នេះ លោកស្រី Kang Kyung-wha បានអះអាងថា កូរ៉េខាងត្បូង​នឹងបន្តធ្វើកិច្ចចរចា​កំរិតខ្ពស់​ជាមួយ​កូរ៉េខាងជើង​ ក្រោមការឃ្លាំមើលយ៉ាង​យកចិត្តទុកដាក់។ លោកស្រី បន្ថែមយ៉ាងដូច្នេះថា «យើងកំពុងបង្កើត​ឱកាស​ដ៏អស្ចារ្យ... ខ្ញុំគិតថា​យើងស្គាល់​កូរ៉េខាងជើង​ ច្បាស់ជាងនរណាៗ​ទាំងអស់ ដោយយើង​បានដោះស្រាយ​ជាមួយកូរ៉េខាងជើង​ អស់រយៈពេល​រាប់ទសវត្សរ៍ និងកំពុងមាន​កិច្ចពិភាក្សាជា​បន្តបន្ទាប់​ផងដែរ»។

គួររំលឹកថា កាលពី​ឆ្នាំ២០១៧ ប្រធានាធិបតី​អាមេរិក លោក ដូណាល់ ត្រាំ បានព្រមាន​កម្ទេចកូរ៉េខាងជើង​ឱ្យក្លាយទៅជាផេះ នៅក្នុងករណី​ចាំបាច់ត្រូវ​ការពារខ្លួន និងសម្ព័ន្ធមិត្ត​ពី​ការវាយប្រហារណាមួយ ពីសំណាក់​ទីក្រុង​ព្យុងយ៉ាង។ ដូច្នេះ បើតាមក្រុមអ្នក​ជំនាញខ្លះ កិច្ចសន្ទនា​បច្ចុប្បន្នរវាង​កូរ៉េខាងត្បូង និងកូរ៉េខាងជើង គ្រាន់តែ​អាចបន្ធូរបន្ថយ​ភាពតានតឹង មួយរយៈតែ​ប៉ុណ្ណោះ នៅក្នុងបរិបទ​ដែលកូរ៉េខាងជើង នៅតែប្រកាន់​ជំហរថា ខ្លួនត្រូវការអាវុធ​នុយក្លេអ៊ែរជាដាច់ខាត ដើម្បីកំញើញ​សហរដ្ឋអាមេរិក៕