(​ហាណូយ)៖ បុគ្គល ឬស្ថាប័នណា​ក៏ដោយ ដែលត្រូវបានគេ​រកឃើញថា បានធ្វើឱ្យខូចខាតដល់​ដើមឈើនៅក្នុង​ប្រទេស​វៀតណាម អាចនឹងត្រូវពិន័យ​ជាប្រាក់រហូត​ដល់ ៣០លានដុង ឬស្មើនឹង ១៣,០០ដុល្លារអាមេរិក អនុឡោមតាម​បទបញ្ជាថ្មីមួយ​ របស់រដ្ឋាភិបាល​វៀតណាម ចេញផ្សាយកាលពី​ថ្ងៃចន្ទ។ នេះបើតាមការ​ចេញផ្សាយ​ដោយ ទីភ្នាក់ងារសារព័ត៌មាន​ចិន ស៊ីនហួរ នៅថ្ងៃពុធ ទី១៧ ខែមករា ឆ្នាំ២០១៨។

ជាមួយគ្នា​នោះដែរ បើតាមទីភ្នាក់ងារ​សារព័ត៌មាន​វៀតណាម ការធ្វើឱ្យខូចខាត​ដល់ដើមឈើ​នៅតាមដងផ្លូវ ឬទីសាធារណៈ រួមមានទាំង​ការកាប់មែកឈើ ឬការដុំដែក គោលដើម្បី​ព្យួរផ្កា ឬអ្វីមួយនៅលើ​ដើមឈើ ដោយគ្មានការ​អនុញ្ញាត អាចនឹងត្រូវបង់ប្រាក់ពិន័យពី ៥០០,០០០ដុង ដល់ ១លានដុង។ ចំណែកឯ​ការពិន័យរដ្ឋបាល​ពី១០ ទៅ ១៥លានដុង នឹងត្រូវអនុវត្ត​លើអ្នកដែលបានចោល ឬគ្រវែងសារធាតុពុល ឬសំរាមទៅលើ​គល់ដើមឈើ ពោលគឺបំផ្លាញ​ដល់ការលូតលាស់​របស់ដើម​ឈើ។

គួរបញ្ជាក់ថា សម្រាប់ការពិន័យ​ធ្ងន់ធ្ងរក្នុងចំនួនទឹកប្រាក់ពី ២០ ទៅ ៣០លានដុង គឺនឹងត្រូវអនុវត្ត​លើអ្នកដែលកាប់បំផ្លាញ ដក ឬដុតដើមឈើ គ្មានការអនុញ្ញាត​ពីអាជ្ញាធរ វៀតណាម៕