(កាណាដា)៖ កាណាដា និងសហរដ្ឋអាមេរិក កំពុងរៀបចំកិច្ចប្រជុំមួយស្ដីពីបញ្ហាឧបទ្វីបកូរ៉េ ក្រោមការចូលរួមពីរដ្ឋមន្ត្រីការបរទេសមកពីប្រទេស ២១។ ប៉ុន្តែទីក្រុងម៉ូស្គូ និងទីក្រុងប៉េកាំង មិនត្រូវបានអញ្ជើញឱ្យចូលរួមនោះទេ ពោលគឺគ្រាន់តែនឹងត្រូវបានគេប្រាប់ ពីលទ្ធផលនៃកិច្ចប្រជុំតែប៉ុណ្ណោះ។ នេះបើតាមរដ្ឋមន្ត្រីការបរទេសរុស្ស៊ី លោក ស៊ឺហ្គៃ ឡាវរ៉ូវ ដកស្រង់ដោយសារព័ត៌មាន Russian Today នៅព្រឹកថ្ងៃអង្គារ ទី១៦ ខែមករា ឆ្នាំ២០១៨។
លោក ស៊ឺហ្គៃ ឡាវរ៉ូវ ថ្លែងបែបនេះនៅក្នុងសន្និសីទសារព័ត៌មានកាលពីថ្ងៃចន្ទ។ ថ្លែងនាឱកាសនោះដែរ ប្រមុខការទូតរុស្ស៊ីរូបនេះបានគូសបញ្ជាក់យ៉ាងដូច្នេះថា «យើងនិងចិន មិនត្រូវបានគេអញ្ជើញឡើយ ប៉ុន្តែយើងត្រូវបានគេជូនដំណឹងតែប៉ុណ្ណោះ... សម្រាប់យើងនេះ គឺជារឿងមិនអាចទទួលយកបាន ហើយមិនតែប៉ុណ្ណោះ ខ្ញុំក៏មិនរំពឹងដែរថា នឹង មានលទ្ធផលល្អព្រោះលទ្ធផលនៃការជួបជុំនេះ នឹងកា្លយការជាធ្វេសប្រហែសមួយ ក្នុងការដោះស្រាយបញ្ហាជាមួយកូរ៉េខាងជើង»។
គួរបញ្ជាក់ថា កិច្ចប្រជុំរៀបចំឡើងដោយសហរដ្ឋអាមេរិក និងកាណាដា ត្រូវបានធ្វើឡើងនៅទីក្រុង Vancouver ប្រទេសកាណាដាពីថ្ងៃទី១៥ រហូតដល់ថ្ងៃទី១៧ ខែមករា ក្នុងគោលបំណងពិភាក្សាគ្នា ពាក់ព័ន្ធនឹងការលុបបំបាត់អាវុធនុយក្លេអ៊ែរ នៅលើឧបទ្វីបកូរ៉េ។ ក្រៅពីសហរដ្ឋអាមេរិក និងកាណាដា ប្រទេសចំនួន ១៨ ផ្សេងទៀត គឺជាអ្នកដែលធ្លាប់បានចូលរួមជាមួយទីក្រុងវ៉ាស៊ីនតោន ក្នុងអំឡុងសម័យសង្រ្គាមកូរ៉េមានដូចជា ដាណឺម៉ាក ក្រិក ន័រវែស និងនូវែលសេឡង់ជាដើម៕
