(សេអ៊ូល)៖ ទីភ្នាក់ងារសារព័ត៌មាន​រដ្ឋកូរ៉េខាងជើង KCNA នៅ​ថ្ងៃអង្គារនេះ បាន​ប្រកាសថា កូរ៉េខាងជើងនឹងបញ្ជូន​ក្រុមសិល្បៈ ១៤០នាក់ ក្នុងនោះរួមមាន​ទាំងក្រុមតន្ត្រី orchestra ផងដែរ មកកាន់​ប្រទេស​កូរ៉េខាងត្បូង នៅអំឡុងព្រឹត្តិការណ៍​កីឡាអូឡាំពិក​រដូវរងារ ក្នុង​ទីក្រុង Pyeong Chang នៅខែកុម្ភៈ​ខាងមុខនេះ។ នេះបើតាមការ​ចេញផ្សាយ ដោយទីភ្នាក់ងារ​សារព័ត៌មាន យ៉ុនហាប់ នៅព្រឹកថ្ងៃអង្គារ ទី១៦ ខែមករា ឆ្នាំ២០១៨។

KCNA នៅក្នុងសេចក្ដីថ្លែងការណ៍​បន្ទាន់មួយចេញផ្សាយ​នៅម៉ោង ៤៖៣៦នាទី ព្រឹក​មិញនេះ បានបញ្ជាក់​ទៀតថា នៅអំឡុង​កិច្ចប្រជុំកូរ៉េទាំងពីរ​បានពិភាក្សាគ្នា​ ប្រកប ដោយ​ភាពស្មោះត្រង់​ លើគំរោងបញ្ជូន​ក្រុមសិល្បៈ​កូរ៉េខាងជើង ឱ្យទៅចូលរួម​សម្ដែងក្នុងព្រឹត្តិការណ៍​កីឡាអូឡាំពិក​រដូវរងា ព្រមទាំងអាច​ឈានដល់ការអនុម័ត​ លើសេចក្ដី​ថ្លែងការណ៍​រួមមួយ​ផងដែរ។

គួរបញ្ជាក់ថា បើតាមសេចក្ដីថ្លែងការណ៍នេះដដែល កូរ៉េខាងជើងនឹង​បញ្ជូនក្រុមសិល្បៈ​ ក្នុងនោះមានទាំង​អ្នកចម្រៀង ក្រុមរាំ និងតន្ត្រីករ​ orchestra ឱ្យមក​ចូលរួមការ ប្រគុំតន្ត្រីក្នុងទីក្រុង​សេអ៊ូល និងទីក្រុង Gangneung ស្ថិតនៅចំងាយ ២៤០គីឡូម៉ែត្រ ពីភាគខាងកើត​ទីក្រុង​សេអ៊ូល៕