(ញូយ៉ក)៖ នាយកប្រតិបត្តិ​ (CEO) នៃក្រុមហ៊ុនយក្សអាមេរិក Amazon លោក ចេហ្វ បេហ្សូស (Jeff Bezos) បានក្លាយជា​អ្នកមាន​ជាងគេបំផុត​​ក្នុងលោក មិនមែនត្រឹមតែ​ពេលបច្ចុប្បន្ន​នេះទេ​ តែគឺគ្រប់​ពេល​វេលាតែម្តង។ នេះបើតាម​​ការចេញផ្សាយ​ដោយ ទីភ្នាក់ងារសារព័ត៌មាន​ចិន ស៊ីនហួរ នៅរសៀលថ្ងៃព្រហស្បតិ៍ ទី១១ ខែមករា ឆ្នាំ២០១៨។

សារព័ត៌មាន Bloomberg និង Forbes បានដាក់​ឈ្មោះ Bezos នៅលើគេនៃ​បញ្ជីឈ្មោះមហាសេដ្ឋី​ពិភពលោក ហើយព្រមពេល​ជាមួយគ្នា Bloomberg បានឱ្យដឹងថា ទ្រព្យសម្បត្តិដុល​របស់នាយកប្រតិបត្តិ​ក្រុមហ៊ុន Amazon រូបនេះកើន​ដល់ ១០៦ពាន់លានដុល្លារ រីឯ Forbes ថា​មាន ១០៥ពាន់លានដុល្លារ គិតត្រឹមថ្ងៃពុធ​ម្សិលមិញ។

បន្ថែមពី​ខាងលើនេះ បើតាមសារព័ត៌មាន​ទាំងពីរ កំណត់ត្រាទ្រព្យសម្បត្តិ​បែបនេះ​ធ្លាប់​ត្រូវបាន​សម្រេចលទ្ធផល ​ដោយស្ថាបនិក​ក្រុមហ៊ុន Microsoft គឹលោក Bill Gates ជាមួយនឹងទ្រព្យ រហូតដល់ទៅ ១០០ពាន់លាន​ដុល្លារ ​កាលពី​ឆ្នាំ១៩៩៩ ប៉ុន្តែបច្ចុប្បន្នលោក Bill Gates ធ្លាកមកឈរនៅលេខ ២ ដោយមានទ្រព្យសម្បត្តិ ៩២ពាន់លានដុល្លារ។

គួរបញ្ជាក់ថា ភាគច្រើន​នៃទ្រព្យរបស់ លោក Jeff Bezos បានមកពីភាគហ៊ុន​របស់លោកក្នុង​ក្រុមហ៊ុន Amazon ចំនួន ៧៨.៩លានហ៊ុន ដែលលោកគ្រប់គ្រង។ តែយ៉ាងណា​ក៏ដោយ​អ្នកខ្លះបាន​អះអាងថា បើសិនជាលោក Bill Gates មិនបរិច្ចាគទ្រព្យសម្បត្តិ​សម្រាប់សកម្មភាព​មនុស្សធម៌ទេ នោះលោក​នៅតែមានទ្រព្យច្រើន​ជាងឆ្ងាយពី លោក Bezos។

ងាកទៅមើលកាលពីអតីតកាល លោក Bill Gates បានបរិច្ចាគភាគហ៊ុនតម្លៃ ៧០០លានដុល្លារ ក្នុងក្រុមហ៊ុន Microsoft កាលពីមុន ហើយបើគិតជាតម្លៃ​នៃពេលបច្ចុប្បន្ន គឺស្មើនឹង ៦១.៨ពាន់លានដុល្លារ និងបរិច្ចាគជាសាច់ប្រាក់ប្រមាណ ២.៩ពាន់លានដុល្លារ គិតចាប់តាំង​ពីឆ្នាំ១៩៩៦ ​មក។ នេះបើតាមទិន្នន័យចេញផ្សាយដោយ Bloomberg៕