(កាលីហ្វ័រញ៉ា)៖ ក្រុមអ្នកជួយ​សង្រ្គោះអាមេរិក​រាប់រយនាក់ កំពុងបន្តប្រតិបត្តិការ​ជួយសង្រ្គោះ និងស្វែងរកមនុស្ស​ជាច្រើននាក់ ដែលកំពុងបាត់ខ្លួន​នៅភាគខាងត្បូង រដ្ឋកាលីហ្វ័រញ៉ា បន្ទាប់ពីមាន​គ្រោះរអិលបាក់ដី​​ នាំមកជាមួយនូវ​ល្បាប់ភក់យ៉ាង​សន្ធប់​ បង្កឡើង​ដោយ​ភ្លៀងធ្លាក់​យ៉ាងខ្លាំង ព្រមទាំងបាន​សម្លាប់ជីវិត​មនុស្សកើនដល់ ១៧នាក់ ហើយ។ នេះបើតាម ការចេញ​ផ្សាយដោយ​សារព័ត៌មាន BBC នៅព្រឹកថ្ងៃព្រហស្បតិ៍ ទី១១ ខែមករា ឆ្នាំ២០១៨។

យោងតាមក្រុម​អ្នកជួយសង្រ្គោះ មនុស្ស ២៨នាក់បានរងរបួស ហើយផ្ទះ​ច្រើនជាង ១០០ខ្នង​ត្រូវបានបំផ្លាញ និងជាង ៣០០ខ្នង​ផ្សេងទៀត​រងការខូចខាត នៅក្នុងតំបន់​រ៉ូមែរ៉ូ ខេនយ៉ុន (Romero Canyon) នៃ​សហគមន៍សាន់តា បារបារ៉ា (Santa Barbara)។ បន្ថែមពី​​លើនេះ មនុស្ស ១៣នាក់ នៅតែបន្តបាត់​ខ្លួននៅ​ឡើយ ខណៈ​៥០នាក់ ត្រូវបានជួយ​សង្រ្គោះ ប៉ុន្តែទន្ទឹមគ្នា​តំបន់មួយចំនួន​ ពិបាកនឹងឱ្យ​អាជ្ញាធរចូល​ទៅដល់ ហើយមិនតែ​ប៉ុណ្ណោះ ផ្លូវជាច្រើន​ក៏ត្រូវសម្រេចឲ្យផ្អាក​សកម្មភាព​ផងដែរ រហូតដល់​ថ្ងៃចន្ទ​សប្ដាហ៍ក្រោយ។

គួរបញ្ជាក់ថា បើតាមអាជ្ញាធរ​អាមេរិក កាលពី​ឆ្នាំ២០១៧ សហរដ្ឋអាមេរិក​បានខាតបង់​ថវិកាជាង ៣០៦ពាន់លាន​ដុល្លារ ដោយសារតែ​គ្រោះមហន្តរាយធម្មជាតិ​ក្នុងនោះ​មានទាំង ព្យុះ ទឹកជំនន់ គ្រោះរអិលបាក់ និងភ្លើងឆេះព្រៃ​ជាដើម៕