(ការីបៀន)៖ គ្រោះរញ្ជួយដី​កម្រិតដ៏ធ្ងន់ធ្ងរ​មួយគឺដល់ទៅ ៧.៨រ៉ិចទ័រ ដែលបានវាយប្រហារ​ដែនសមុទ្រភាគខាងជើង នៃ​​ប្រទេស​ហុងឌូរ៉ាស់ នៅក្នុង​ផ្ទៃ​សមុទ្រការីបៀន​នៃតំបន់អាមេរិក​កណ្តាល ទំនងជាមិនបានបង្កជារលកយក្សស៊ូណាមិ និងមនុស្សណាម្នាក់រងគ្រោះថ្នាក់​នោះឡើយ។ នេះបើតាមការ​​ចេញផ្សាយ​ដោយ ទីភ្នាក់ងារព័ត៌មាន Reuters នៅព្រឹក​ថ្ងៃពុធ ទី១០ ខែមករា ឆ្នាំ២០១៨។

បើតាមមជ្ឈមណ្ឌលឃ្លាំ​មើល​រលកយក្សនៃតំបន់ប៉ាស៊ីហ្វិក សារព្រមានអំពី​រលកស៊ូណាមិ ត្រូវ​បាន​ចេញ​សម្រាប់​​តំបន់​រដ្ឋ​បាល Puerto Rico និងកោះ Virgin របស់សហរដ្ឋអាមេរិក ប៉ុន្តែក្រោយមកក៏បានស្ងប់ស្ងាត់ទៅវិញ ហើយក៏ពុំទាន់មានសេចក្តីរាយការណ៍ពីការខូចខាត​ហេដ្ឋរចនាសម្ព័ន្ធណាមួយនោះដែរ ព្រោះការញ័ររញ្ជួយស្ថិតនៅឆ្ងាយពីដីគោក នៃប្រទេស​ហុងឌូរ៉ាស់ និងបណ្តាប្រទេសជុំវិញសមុទ្រការីបៀន។

គួរបញ្ជាក់ថា ក្រោយគ្រោះរញ្ជួយដីភ្លាមៗ ទីភ្នាក់ងារឃ្លាំមើល​ភូមិសាស្រ្ត​អាមេរិក USGS បានឲ្យ​ដឹង​ថា ​រលកស៊ូណាមិធំៗ​អាចនឹងកើតមាន​ឡើងបាន នៅតាមបណ្តោយឆ្នេរនានា ដែលស្ថិតក្នុងរយៈចម្ងាយ ១,០០០គីឡូម៉ែត្រ ​នៃចំណុច​រំញ័ររបស់គ្រោះរញ្ជួយផែនដី ដែលក្នុងករណីនេះ​រួមមានឆ្នេរសមុទ្ររបស់ប្រទេស ចាមៃកា, ម៉ិចស៊ីកូ, ហុងឌូរ៉ាស់, គុយបា, បេលីស (Belize), កូស្តារីកា, និងជាច្រើនផ្សេងទៀត៕