(វ៉ាស៊ីនតោន)៖ សហរដ្ឋអាមេរិកនៅថ្ងៃអង្គារសប្ដាហ៍នេះ បានសម្ដែងការសាទរចំពោះសញ្ញាវិជ្ជមាន នៃកិច្ចសន្ទនាលើកដំបូងក្នុងរយៈពេលជាងពីរឆ្នាំមកនេះ រវាងកូរ៉េទាំងពីរ ប៉ុន្តែទន្ទឹមទីក្រុងវ៉ាស៊ីនតោន មិនបានបង្ហាញការគាំទ្រយ៉ាងពេញទំហឹងនោះទេ ក៏ព្រោះទីក្រុងវ៉ាស៊ីនតោននៅតែគិតគូរជានិច្ច ចំពោះការគំរាមកំហែងដោយអាវុធនុយក្លេអ៊ែរ ដែលបំពានច្បាប់អន្តរជាតិរបស់ទីក្រុងព្យុងយ៉ាង។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃពុធ ទី១០ ខែមករា ឆ្នាំ២០១៨។
នៅក្នុងសន្និសីទសារព័ត៌មាន អ្នកនាំពាក្យសេតវិមាន លោកស្រី សារ៉ា សេនដឺស (Sarah Sanders) បានស្វាគមន៍កិច្ចសន្ទនាកម្រិតខ្ពស់ រវាងកូរ៉េខាងត្បូងនិងកូរ៉េខាងជើងដែលបានឈានដល់ការព្រមព្រៀងគ្នាថា នឹងរៀបចំកិច្ចចរចាយោធា ក៏ដូចជាការបញ្ជូនប្រតិភូ និងអត្តពលិកកូរ៉េខាងជើង ឱ្យទៅចូលរួមក្នុងព្រឹត្តិការណ៍អូឡាំពិករដូវរងារនៅកូរ៉េខាងត្បូង នៅខែក្រោយនេះ។
លោកស្រី Sanders បានគូសបញ្ជាក់យ៉ាងដូច្នេះថា «ការចូលរួមរបស់កូរ៉េខាងជើង គឺជាឱកាសមួយសម្រាប់របបទីក្រុងព្យុងយ៉ាង ដើម្បីមើលឃើញពីតម្លៃ នៃការបញ្ចប់ទណ្ឌកម្មអន្តរជាតិ តាមរយៈការលុបបំបាត់អាវុធនុយក្លេអ៊ែរ»។ ដោយឡែកនៅក្នុងសន្និសីទសារព័ត៌មានដ៏ខ្លីមួយ លោក ស្ទេវ ហ្គោលស្ទែន (Steve Goldstein) អ្នកនាំពាក្យ ក្រសួងការបរទេសអាមេរិកបានលើកឡើងផងដែរថា «ច្បាស់ណាស់ នេះគឺជាការវិវឌ្ឍន៍ប្រកបដោយភាពវិជ្ជមាន ប៉ុន្តែយើងក៏ចង់ឱ្យមានកិច្ចចរចា លើសំណុំរឿងនុយក្លេអ៊ែរកូរ៉េខាងជើង»។
គួរបញ្ជាក់ថា កាលពីសប្ដាហ៍មុនប្រធានាធិបតីអាមេរិក លោក ដូណាល់ ត្រាំ បាននិយាយជាសាធារណៈថា លោកមានដំណងចង់ធ្វើពិភាក្សាតាមទូរស័ព្ទជាមួយមេដឹកនាំ កូរ៉េខាងជើង លោក គីម ជុងអ៊ុន។ តែទន្ទឹមគ្នា លោក ត្រាំ ក៏បានអះអាងថា កិច្ចសន្ទនានេះមែនធ្វើឡើងដោយគ្មានលក្ខខ័ណ្ឌនោះទេ។ សម្រាប់ភាពវិជ្ជមាននៃទំនាក់ទំនងកូរ៉េទាំងពីរខាងលើនេះ ពិតជាមិនធ្លាប់មានឡើយក្នុងរយៈពេលជិត ០២ឆ្នាំ មកនេះ ដោយវាអាចនឹងឈានដល់កិច្ចប្រជុំកំពូលរវាងគ្នា ក្រោយប្រធានាធិបតីកូរ៉េខាងត្បូងបង្ហាញការស្វាគមន៍៕
