(សេអ៊ូល)៖ ប្រធានក្រុមដឹកនាំ​កិច្ចចរចាអន្តរកូរ៉េរបស់​កូរ៉េខាងជើង លោក រី សុន ក្វុន (Ri Son Gwon) បាននិយាយនៅថ្ងៃអង្គារនេះថា លោករំពឹងថាកិច្ចសន្ទនា​រវាងកូរ៉េខាងត្បូង និងកូរ៉េខាងជើង ជាលើកដំបូងក្នុង​រយៈពេលជិតពីរ​ឆ្នាំមកនេះ នឹងទទួលបាន​លទ្ធផលល្អ។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន Reuters នៅព្រឹកថ្ងៃអង្គារ ទី០៩ ខែមករា ឆ្នាំ២០១៨។​

ថ្លែងនៅមុនចូល​កិច្ចប្រជុំអន្តរកូរ៉េ​នៅម៉ោង ១០៖០០នាទីព្រឹក ថ្ងៃអង្គានេះ នៅឯភូមិ Panmunjom លោក Ri Son Gwon បានលើក​ឡើងដូច្នេះថា «នៅថ្ងៃនេះ​កូរ៉េខាងជើង និងកូរ៉េខាងត្បូង នឹងចូលរួម​ក្នុងកិច្ចប្រជុំជា​មួយជំហរ​ពិតប្រាកដ និងស្មោះត្រង់... ហើយ​ខ្ញុំសង្ឃឹមថា កិច្ចសន្ទនានេះ​នឹងទទួលបាន​លទ្ធផលល្អ»។

គួរបញ្ជាក់ថា កូរ៉េខាងជើង និងកូរ៉េខាងត្បូង នៅថ្ងៃអង្គារនេះ​បានចាប់ផ្តើម​ចរចាគ្នាជាផ្លូវការ​ហើយ ដើម្បីពិភាក្សាគ្នា​ស្តីពីការបញ្ជូនអត្តពលិក​កូរ៉េខាងជើង ទៅចូលរួម​ប្រកួតកីឡាអូឡាំពិក​រដូវរងារនៅ​ឯទីក្រុង Pyeong Chang ប្រទេស​កូរ៉េខាងត្បូង ពីថ្ងៃទី០៩ ដល់ថ្ងៃទី២៥ ខែកុម្ភៈ ក្រោយនេះ។ ប៉ុន្តែទន្ទឹមគ្នា បើតាមសារព័ត៌មាន​កូរ៉េខាងត្បូង ទីក្រុងសេអ៊ូល ទំនងជាអាច​នឹងលើកឡើង​ផងដែរ ពីផ្លូវនាំទៅរក​ការស្ដារទំនាក់ទំនង​ឡើងវិញ រវាងកូរ៉េទាំងពីរ ព្រមទាំង​ការរៀបចំជំនួប​គ្រួសារកូរ៉េ ​ដែលបានព្រាត់ប្រាស់គ្នានៅអំឡុងសម័យ​សង្រ្គាម​កូរ៉េ៕