(ម៉ានីល)៖ បើទោះជាកំពុងស្ថិតនៅក្រោម​ការថ្កោទោស និងរិះគន់ពីសំណាក់​ក្រុមអង្គការសិទ្ធិមនុស្ស​ ទាក់ទិននឹងសង្រ្គាម​គ្រឿងញៀន​ក៏ដោយ ក៏ប្រធានាធិបតី​ហ្វីលីពីន លោក រ៉ូឌ្រីហ្គោ ឌូតឺតេ នៅតែទទួល​បានការ​ទុកចិត្ត និងគាំទ្រខ្លាំងដដែល​ពីប្រជាជនហ្វីលីពីន។ នេះបើតាម​ការស្ទង់មតិ​មួយ ចេញផ្សាយដោយ​ទីភ្នាក់ងារសារព័ត៌មាន​ចិន ស៊ីនហួរ នៅរសៀលថ្ងៃចន្ទ ទី០៨ ខែមករា ឆ្នាំ២០១៨។

យោងតាមការស្ទង់មតិ​ធ្វើឡើងដោយស្ថាប័ន Pulse Asia Inc កាលពីខែធ្នូ ឆ្នាំ២០១៧ ៨០ភាគរយ នៃមនុស្ស ១,២០០នាក់ មានអាយុចាប់ពី ១៨ឆ្នាំឡើង បានគាំទ្រ​ចំពោះ​ផ្លូវដែល លោក ឌូតឺតេ កំពុដឹកនាំ​ប្រទេស ខណៈ​ ៨២ភាគរយ​ និយាយថា​ពួកគេជឿជាក់លើប្រធានាធិបតី​ហ្វីលីពីន​រូបនេះ។ ដោយឡែក ការស្ទង់មតិ​នេះដដែល ក៏បានបង្ហាញ​ដែរថា អនុ​ប្រធានាធិបតី​ហ្វីលីពីន លោកស្រី ម៉ារីយ៉ា លីអូណ័រ រ៉ូប្រេដូ (Maria Leonor Robredo) ទទួលបានការគាំទ្រ ៥៩ភាគរយ រីឯប្រធាន​ព្រឹទ្ធសភា​លោក អាគីលីណូ ភីមិនទែល (Aquilino Pimentel) ទទួលបាន ៥៨ភាគរយ។

គួរបញ្ជាក់ថា លោក រូឌ្រីហ្គោ ឌូតឺតេ បានជាប់ឆ្នោត និងឡើងកាន់តំណែងជា​ប្រធានាធិបតីហ្វីលីពីន​ផ្លូវការ កាល​ពីថ្ងៃទី៣០ ខែមិថុនា ឆ្នាំ២០១៦ ហើយលោកនឹង​ត្រូវបញ្ចប់អាណត្តិ​នេះ​នៅឆ្នាំ​២០២២ ខាងមុខ។ លោក ឌូតឺតេ បានព្យាយាម​ធ្វើតាមពាក្យសន្យា​របស់​​លោក នៅក្នុងការបំបាត់បទឧក្រិដ្ឋកម្មដ៏ក្តៅគគុកក្នុងសង្គម ជាពិសេសជំនួញគ្រឿងញៀន ដែលត្រូវបានប្រជាជនហ្វីលីពីន​ចាត់ទុកថា ជារឿងធ្ងន់ធ្ងរបំផុត​ដែលអតីតរដ្ឋបាល លោក ប៊ែនីកណូ អាគីណូ ទី៣ មិនអាច​ធ្វើការដោះស្រាយបាន ​ប្រកបដោយប្រសិទ្ធភាពនោះឡើយ៕