(រីយ៉ាដ)៖ សារព័ត៌មានអារ៉ាប៊ីសាអូឌីត Al Arabiya នៅថ្ងៃចន្ទ ទី០៨ ខែមករានេះ បានចេញផ្សាយរូបថតផ្ដាច់មុខជាច្រើនសន្លឹក បង្ហាញពីមុខរបស់កូនប្រុសនៃអតីត មេដឹកនាំក្រុមអាល់កៃដា អូសាម៉ា ប៊ិនឡាដិន (Osama bin Laden) ឈ្មោះ ហាំស្សា ប៊ិនឡាដិន (Hamza bin Laden) ជាមួយនឹងបងប្អូនប្រុសរបស់គាត់ នៅក្នុងប្រទេសអ៊ីរ៉ង់។
យោងតាម Al Arabiya រូបថតទាំងនោះ បានបង្ហាញពីមុខមាត់របស់ Hamza bin Laden ជាទាយាតស្នងតំណែងមេដឹកនាំក្រុមអាល់កៃដា ដែលមិនដែលបង្ហាញពីមុខមាត់ពិតរបស់ Hamza ឡើយ ក្រៅតែពីបញ្ចេញសារសំឡេង នារយៈពេលប៉ុន្មានឆ្នាំថ្មីៗនេះ។ បន្ថែមពីលើនេះ Al Arabiya ក៏បានចេញផ្សាយផងដែរ នូវរូបថតរបស់កូនប្រុសពីរនាក់ទៀតរបស់ Osama bin Laden គឺ Mohammad និង Laden។ ប៉ុន្តែព្រមពេលជាមួយគ្នា សារព័ត៌មានអារ៉ាប៊ីសាអូឌីតមួយនេះមិនបានបញ្ជាក់ថា ខ្លួនទទួលបានរូបថតទាំងនេះតាមវិធីណានោះទេ។
គួរបញ្ជាក់ថា កូនប្រុសទាំងបីនាក់របស់ លោក Osama bin Laden បានបែកគ្នា បន្ទាប់ពីពួកគេចាកចេញពីប្រទេសអ៊ីរ៉ង់ ហើយគេជឿជាក់ថា រូបថតទាំងនេះត្រូវបានថត នៅពេលពួកគេចាកចេញពីប្រទេសអ៊ីរ៉ង់ កាលពីឆ្នាំ២០០៩៕
