(វ៉ាស៊ីនតោន)៖ នាយកទីភ្នាក់ស៊ើបការណ៍​សំងាត់​អាមេរិក CIA លោក ម៉ៃក៍ ប៉ុមព្យ៉ូ (Mike Pompeo) បាននិយាយថា ប្រទេសរុស្ស៊ី និងបណ្ដាប្រទេស​ដទៃមួយចំនួន កំពុង​ព្យាយាមបំផ្លាញ ការបោះឆ្នោត​នៅក្នុង​សហរដ្ឋអាមេរិក រួមមានទាំងការ​បោះឆ្នោតសភា​អាមេរិក​ពាក់កណ្ដាល​អាណត្តិ នៅខែវិច្ឆិកាខាងមុខនេះ ជាពេលដែលក្រុម​អ្នកសាធារណៈរដ្ឋ​ ស្វះស្វែងបន្តគ្រប់គ្រង​សភាបន្តទៀត។ នេះបើតាមការ​ចេញផ្សាយ​ដោយ ទីភ្នាក់ងារសារព័ត៌មាន Reuters នៅព្រឹកថ្ងៃចន្ទ ទី០៨ ខែមករា​ ឆ្នាំ២០១៨។

លោក Mike Pompeo ថ្លែងបែបនេះ​នៅក្នុងកិច្ចសម្ភាសន៍​ជាមួយកម្មវិធី Face the Nation របស់ស្ថានីយ​ទូរទស្សន៍ CBS។ នាឱកាស​នោះដែរ នាយក CIA រូបនេះ​បានបញ្ជាក់​ជាថ្មីថា រុស្ស៊ីបានលូកដៃ​ចូលក្នុងកិច្ចការ​បោះឆ្នោត​អាមេរិក អស់រយៈពេលរាប់​ទសវត្សរ៍មក​ហើយ។
ដោយឡែក​នៅពេល​អ្នកសារព័ត៌មាន​សួរថា ទីក្រុងម៉ូស្គូ​កំពុងព្យាយាម​បំផ្លាញការបោះឆ្នោត​​អាមេរិកដែរ ឬទេ? លោក Pompeo បានឆ្លើយដោយ​មិនបានបញ្ជាក់​លម្អិតយ៉ាងដូច្នេះថា «បាទ! ជាការពិត​ណាស់ វាបានកើត​ឡើងជាយូរមក​ហើយ... ខ្ញុំនៅតែ​ព្រួយបារម្ភ ប៉ុន្តែមិនមែន​ព្រួយបារម្ភ ​ចំពោះរុស្ស៊ី​តែមួយគត់​នោះទេ​ ត្បិតនៅតែ​មានប្រទេសមួយ​ចំនួនទៀត ក៏កំពុងជ្រៀតជ្រែក​ចូលក្នុងកិច្ចការ​បោះឆ្នោត​អាមេរិកដែរ ខណៈយើង​មានសត្រូវមួយ​ចំនួន​ កំពុងព្យាយាមបំផ្លាញ​ប្រជាធិតេយ្យ​លោក​ខាងលិច»។

គួរបញ្ជាក់ថា ទីភ្នាក់ងារស៊ើបការណ៍​សំងាត់​អាមេរិក CIA ធ្លាប់បានសន្និដ្ឋាន​ និងចោទប្រកាន់​ថា រុស្ស៊ី បានលូកដៃ​ចូលក្នុងកិច្ចការ​បោះឆ្នោត​ប្រធានាធិបតី​អាមេរិក កាលពី​ឆ្នាំ២០១៦ ដើម្បី​ជួយ លោក ដូណាល់ ត្រាំ ផ្ដួល​លោកស្រី ហ៊ីលឡារី គ្លីនតុន តាម​រយៈការ Hack និង​ទម្លាយ​សារអេឡិចត្រូនិករបស់សលោក​ស្រី គ្លីនតុន។ ប៉ុន្តែទីក្រុង ម៉ូស្គូបានបដិសេធជាច្រើន​ដង៕