(គូឡាឡាំពួ)៖ សម្ព័ន្ធបក្ស​ប្រឆាំងនៃ​ប្រទេស​ម៉ាឡេស៊ី បានសម្រេច​ជ្រើសរើស​អតីតនាយករដ្ឋមន្រ្តីវ័យ ៩២ឆ្នាំ លោក មហាធា ម៉ូហាម៉ាដ (Mahathir Mohamad) ជាបេក្ខភាពនាយករដ្ឋមន្រ្តី​របស់ខ្លួន សម្រាប់ការបោះឆ្នោត​សភា ដែលនឹងប្រព្រឹត្ត​ទៅនាខែសីហា​ខាងមុខ។ នេះបើ​តាម​ការចេញផ្សាយ​ដោយ ទីភ្នាក់ងារព័ត៌មាន Reuters នៅព្រឹក​ថ្ងៃចន្ទ ទី០៨ ខែមករា ឆ្នាំ២០១៨។

ដោយមេបក្សប្រឆាំង​ដ៏មានប្រជាប្រិយជាងគេ​បង្អស់ នៃប្រទេស​អាស៊ានមួយនេះ គឺលោក អាន់វ៉ារ អ៊ីប្រាហ៊ីម (Anwar Ibrahim) កំពុងស្ថិតក្នុង​ពន្ធនាគារ​ លោក Mahathir ត្រូវបានគេ​មើលឃើញថា ជាការគម្រាមកំហែង​ដ៏ធំបំផុត សម្រាប់នាយករដ្ឋមន្រ្តី​កំពុងកាន់អំណាច បច្ចុប្បន្ន គឺលោក ណាជីប រ៉ាហ្សាក់ (Najib Razak) ដែលចោមរោមដោយរឿង​ពុករលួយ។

គួរជម្រាបថា លោក Mahathir ដែល​ធ្លាប់បានកាន់​មុខតំណែងជានាយករដ្ឋមន្រ្តី​ម៉ាឡេស៊ី ចាប់ពីឆ្នាំ១៩៨១ ដល់ឆ្នាំ២០០៣នោះ នឹង​ក្លាយជាមេដឹកនាំ​ចំណាស់ជាងគេបង្អស់​លើលោក ប្រសិនបើ​សម្ព័ន្ធបក្សប្រឆាំង Pakatan Harapan ទទួល​ជ័យជម្នះ នៅក្នុងការបោះឆ្នោត ដែលនឹងធ្វើឡើងនៅខែសីហា ឆ្នាំ២០១៨ ខាងមុខនេះ៕