(ព្យុងយ៉ាង)៖ មន្រ្តីតំណាងកូរ៉េខាងជើង នៅឯគណៈកម្មាធិការអូឡាំពិកអន្តរជាតិ IOC បានបង្ហើបឲ្យដឹងនាថ្ងៃសៅរ៍នេះថា ប្រទេសកុម្មុយនិស្តដែលស្នេហាវិស័យកីឡាមួយនេះ ទំនងជានឹងបញ្ជូនក្រុមអត្តពលិករបស់ខ្លួន ទៅចូលរួមក្នុងព្រឹត្តិការណ៍ប្រកួតកីឡាអូឡាំពិករដូវរងារនាខែក្រោយ ដែលនឹងប្រព្រឹត្តទៅនៅលើទឹកដី នៃប្រទេសកូរ៉េខាងត្បូង។ នេះបើតាមសេចក្តីរាយការណ៍របស់ សារព័ត៌មានជប៉ុន Kyodo ដកស្រង់ដោយសារព័ត៌មានចិន CGTN នៅរសៀលថ្ងៃសៅរ៍ ទី០៦ ខែមករា ឆ្នាំ២០១៨។
ទីភ្នាក់ងារព័ត៌មានជប៉ុន Kyodo បានបញ្ជាក់ថា តំណាងកូរ៉េខាងជើងប្រចាំ IOC លោក Chang Ung បានធ្វើការអត្ថាធិប្បាយយ៉ាងខ្លីខាងលើ ទៅកាន់ក្រុមអ្នកកាសែតក្នុងអំឡុងពេលរូបលោក ធ្វើដំណើរឆ្លងកាត់អាកាសយានដ្ឋានអន្តរជាតិ នៃរដ្ឋធានីប៉េកាំង របស់ប្រទេសចិន។
គួរជម្រាបថា បើតាមទីក្រុងសេអ៊ូល កូរ៉េខាងជើងបានទទួលយកសំណើរបស់ខ្លួន ក្នុងការជួបពិភាក្សាគ្នាអំពីរឿងចូលរួមព្រឹត្តិការណ៍កីឡាអន្តរជាតិនេះ ពីសំណាក់ទីក្រុងព្យុងយ៉ាង ដែលនឹងធ្វើឡើងនៅថ្ងៃទី០៩ ខែមករា ពោលគឺសប្តាហ៍ក្រោយនេះ។ សំណើនោះទៀតសោត ត្រូវបានធ្វើឡើងបន្ទាប់ពីប្រមុខដឹកនាំកំពូល លោក គីម ជុនអ៊ុន បានបង្ហាញពីចេតនាចង់ជួបចរចាគ្នា ក៏ដូចជាចង់បញ្ជូនប្រតិភូជាន់ខ្ពស់ទៅចូលរួមការប្រកួតកីឡានេះ នៅក្នុងថ្ងៃបើកទំព័រឆ្នាំសកល ២០១៨។
គួរបញ្ជាក់ផងដែរថា ព្រឹត្តិការណ៍កីឡាអូឡាំពិករដូវរងារឆ្នាំ២០១៨នេះ នឹងប្រព្រឹត្តទៅនៅឯទីក្រុង Pyoengchang ប្រទេសកូរ៉េខាងត្បូង ចាប់ពីថ្ងៃទី០៩ ដល់ទី២៥ ខែកុម្ភៈខាងមុខ៕
]
