(តេហរ៉ង់)៖ រដ្ឋអាជ្ញាអ៊ីរ៉ង់លោក Mohammad Jafar Montazeri បាននិយាយជាសាធារណៈថាទីភ្នាក់ងារស៊ើបការសម្ងាត់អាមេរិក CIA, អ៊ីស្រាអែល និងអារ៉ាប៊ីសាអូឌីត គឺជាមេក្លោងបង្កចលាចល និងបាតុកម្មតវ៉ាដោយហិង្សានៅក្នុងប្រទេសអ៊ីរ៉ង់ ដែលបណ្ដាលឱ្យមនុស្សច្រើនជាង២០នាក់ បាត់បង់ជីវិត គិតចាប់តាំងពីថ្ងៃព្រហស្បតិ៍ សប្ដាហ៍មុនមក។ នេះបើតាមការចេញផ្សាយដោយសារព័ត៌មាន Russian Today ​នៅថ្ងៃសុក្រ ទី០៥ ខែមករា ឆ្នាំ២០១៨។

តាមរយៈការស្រង់សម្ដីដោយសារព័ត៌មានរដ្ឋអ៊ីរ៉ង់ កាលពីថ្ងៃព្រហស្បតិ៍ លោក Mohammad Jafar Montazeri បានអះអាងថា អ្នកនៅពីក្រោយការរៀបចំផែនការបង្ក ចលាចលនៅក្នុងប្រទេសអ៊ីរ៉ង់ ​គឺជាបុរសជនជាតិអាមេរិកម្នាក់ ឈ្មោះ Michael Andrea ដែលលោកចោទថាជាអតីតទីភ្នាក់ងារស៊ើបការសំងាត់អាមេរិក CIA​ និងជាអ្នក បង្កើតមនុស្សមួយក្រុមដើម្បីបង្កើតភាពវឹកវរក្នុងប្រទេស។ មិនតែប៉ុណ្ណោះ រដ្ឋអាជ្ញារូបនេះ ក៏បានចង្អុលមុខអារ៉ាប៊ីសាអូឌីត និងទីភ្នាក់ងារចារកម្មអ៊ីស្រាអែល Mossad ផងដែរថា បានឃុបឃិតគ្នារៀបចំផែនការញុះញង់ឱ្យមានបាតុកម្មតវ៉ាប្រឆាំងនឹងរដ្ឋាភិបាលអ៊ីរ៉ង់។

គួរបញ្ជាក់ថា ក្រុមប្រឹក្សាសន្តិសុខនៃអង្គការសហប្រជាជាតិ UNSC នឹងបើកកិច្ចប្រជុំបន្ទាន់មួយ នា​រសៀលថ្ងៃ​សុក្រ​សប្តាហ៍​នេះ (ពេលវេលា​នៅទីក្រុងញូយ៉ក) ដើម្បី ពិភាក្សាពីវិបត្តិដែលកំពុងកើតមាននៅក្នុងប្រទេសអ៊ីរ៉ង់ ក្រោយ​​មាន​ការ​ស្នើ​យ៉ាង​ទទូច​​ពី​សហរដ្ឋអាមេរិក​៕