(វ៉ាស៊ីនតោន)៖ ប្រព័ន្ធផ្សព្វផ្សាយអាមេរិកមួយចំនួន បានចាប់ផ្ដើមចោទសួរពី «សុខភាពផ្លូវចិត្ត» របស់លោក ដូណាល់ ត្រាំ ក្រោយប្រធានាធិបតីអាមេរិករូបនេះ បានអួតអាងថា លោកមានប៊ូតុងនុយក្លេអ៊ែរ ធំជាងប៊ូតុងនុយក្លេអ៊ែររបស់មេដឹកនាំកូរ៉េខាងជើង លោក គីម ជុងអ៊ុន។ យ៉ាងណាក៏ដោយខាងសេតវិមានបានឆ្លើយតបថា លោក គីម ជុងអ៊ុន ទៅវិញទេដែលគេគ្រប់គ្នាត្រូវបានព្រួយបារម្ភ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃព្រហស្បតិ៍ ទី០៤ ខែមករា ឆ្នាំ២០១៨។
កាលពីថ្ងៃពុធម្សិលមិញ អ្នកយកព័ត៌មានមួយរូប មកពីស្ថានីយ៍ទូរទស្សន៍ NBC បានចោទសួរអ្នកនាំពាក្យសេតវិមាន លោកស្រី សារ៉ាហ៍ ហាក់ខាប៊ី សេដឺស (Sarah Huckabee Sanders) ថា តើប្រជាជនអាមេរិកគួរតែព្រួយបារម្ភ ពីសុខភាពផ្លូវចិត្តរបស់ លោក ដូណាល់ ត្រាំ ដែរឬទេ? បន្ទាប់ពីលោកនិយាយពីប៊ូតុងនុយក្លេអ៊ែរ។ ប៉ុន្តែជាការឆ្លើយតប លោកស្រី Sanders បាននិយាយថា ប្រជាជនអាមេរិកមិនត្រូវបារម្ភពីលោក ត្រាំ នោះទេ។
លោកស្រីបានគូសបញ្ជាក់យ៉ាងដូច្នេះថា «ខ្ញុំគិតថា លោកប្រធានាធិបតី និងប្រជាជនអាមេរិក គួរតែព្រួយបារម្ភពីសុខភាពផ្លូវចិត្តរបស់មេដឹកនាំកូរ៉េខាងជើង លោក គីម ជុងអ៊ុន ពីព្រោះគាត់បានគំរាមហែងជាច្រើនលើកច្រើនសារ និងបាញ់សាកល្បងមីស៊ីល ឥតឈប់ឈរ... លោក ត្រាំ គឺជាប្រធានាធិបតីដែលគោរពតាមពាក្យសន្យារបស់ខ្លួន ហើយក៏មិនមែនជាប្រធានាធិបតីដែលនឹងចុះខ្សោយ ឬទន់ខ្សោយនោះទេ គាត់នឹងឈរការពារប្រជាជនអាមេរិក»។
គួររំលឹកថា កាលពីថ្ងៃពុធកន្លងទៅ លោក ដូណាល់ ត្រាំ បានសរសេរនៅលើ Twitter ថាលោកមានប៊ូតុងនុយក្លេអ៊ែរធំ និងខ្លាំងជាងប៊ូតុងនុយក្លេអ៊ែរ របស់លោក គីម ជុងអ៊ុន។ ការលើកឡើងបែបនេះជាការឆ្លើយតបនឹងលោក គីម ដែលថាលោកមានប៊ូតុងនុយក្លេអ៊ែរ ទុកនៅលើតុគ្រប់ពេលវេលា ហើយថាបើសិនជាចាំបាច់ដើម្បីការពារសន្តិសុខជាតិ លោកនឹងមិនស្ទាក់ស្ទើរឡើយ ក្នុងការប្រើប្រាស់អាវុធនុយក្លេអ៊ែរ៕
