(ហ្គាហ្សា)៖ មេដឹកនាំ​ចលនាហាម៉ាស-ប៉ាឡេស្ទីន លោក អ៊ីស្មែល ហានេយ៉ា (Ismail Haneya) បានអំពាវនាវ​ឲ្យគ្រប់ភាគីពាក់ព័ន្ធ​​ទាំងអស់ រៀបចំ​បង្កើតយុទ្ធសាស្រ្ត​ប្រឈមមុខ​គ្រប់ជ្រុង​ជ្រោយមួយ ដើម្បីទប់ស្កាត់​ចេតនាអាក្រក់​នាពេលថ្មីៗ របស់​សហរដ្ឋអា​​មេរិក រួមនិង​អ៊ីស្រាអែល ជុំវិញបញ្ហាទទួលស្គាល់ទីក្រុង​ហ្សេរុយសាឡឹម។ នេះបើតាម​ការចេញផ្សាយ​ដោយ ទីភ្នាក់ងារ​ព័ត៌មានចិន ស៊ីនហួរ នៅ​ព្រឹក​​ថ្ងៃពុធ ទី០៣​ ខែមករា ឆ្នាំ២០១៨។

យោងតាម​លោក Haneya ដោយឈរ​លើចលនា Intifada របស់ប៉ាឡេស្ទីន​ប្រឆាំងនឹង​អ៊ីស្រាអែល យុទ្ធសាស្រ្ត​ខាងលើ គួរតែ​​រៀប​ចំនូវ​កម្មវិធីរួបរួមសាមគ្គី​នៃប៉ាឡេស្ទីន អារ៉ាប់ និងអ៊ីស្លាម ដើម្បីប្រឈមមុខ​តទល់ជាមួយ​ការសម្រេចចិត្ត​ លើទីក្រុងពិសិដ្ឋ​ហ្សេរុយ​សាឡឹម ដោយអាមេរិក និងអ៊ីស្រាអែល។ មេដឹកនាំ​ហាម៉ាស​រូបនេះ ក៏បានអំពាវនាវ​ឲ្យប្រទេស​ដទៃទៀត ដែលគាំទ្រ​ដល់​ប៉ាឡេ​​ស្ទីន​ ហើយប្រឆាំង​គោលនយោបាយ​របស់ទីក្រុងវ៉ាស៊ីនតោន​នោះ មកចូលរួម​ជាមួយពួកគេ នៅក្នុងយុទ្ធសាស្រ្ត​បង្រួបបង្រួម​នេះ​ផងដែរ។

ជាចុងក្រោយ លោក Haneya បានបញ្ជាក់​ច្បាស់ៗថា ប្រធានាធិបតី​អាមេរិក លោក ដូណាល់ ត្រាំ និងបក្សកាន់​អំណាច Likud របស់​អ៊ីស្រាអែល នឹងមិនអាច​ផ្លាស់ប្តូរ​អត្តសញ្ញាណ ឬបុគ្គលិក​លក្ខណៈនៃទីក្រុង​ហ្សេរុយសាឡឹម ដែលតែងតែ​ជាមុខមាត់ និង​អត្តសញ្ញាណ​មួយ​របស់ប៉ាឡេស្ទីន អារ៉ាប់ និងអ៊ីស្លាម​បានឡើយ៕