(សាន់ហ្វ្រាន់ស៊ីស្កូ)៖ អាកាសចរណ៍ Alaska Airline របស់សហរដ្ឋអាមេរិក ដែលមានជើងហោះហើរលេខ៩១៥ បានបង្ខំចិត្តលុបចោលជើងហោះហើររបស់ខ្លួន បន្ទាប់ពីមានការលុកលុយពីសត្វកណ្តុរមួយក្បាល ដែលត្រូវបានគេប្រទះឃើញរត់ចូលទៅក្នុងយន្តហោះ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃពុធ ទី០៣ ខែមករា ឆ្នាំ២០១៨។
ជើងហោះហើរ ៩១៥ ដែលគ្រោងនឹងចាកចេញពីទីក្រុង អូកលែន (Oakland) នៃរដ្ឋកាលីហ្វរញ៉ា ទៅកាន់ទីក្រុងផតលែន (Portland) នៃរដ្ឋវ៉ាស៊ីនតោននោះត្រូវបានលុបចោល ក្រោយពីអ្នកដំណើរទាំងអស់ បានឡើងលើយន្តហោះ ដើម្បីត្រៀមចេញដំណើររួចទៅហើយ។ ក្រោយអ្នកដំណើរភាគច្រើន ក្នុងចំណោមអ្នកដំណើរទាំង ១១០នាក់ ត្រូវបានណែនាំឲ្យធ្វើដំណើរតាមជើងហោះហើរមួយផ្សេងទៀត ទៅកាន់ក្រុង Portland នាប៉ុន្មានម៉ោងក្រោយ។
គួរជម្រាបថា បើតាមសេចក្តីថ្លែងការណ៍របស់អាកាសចរណ៍ Alaska Airlines នាខណៈពេលនេះ យន្តហោះខាងលើ ពុំទាន់អាចបម្រើសេវាបាននៅឡើយទេ តែវានឹងវិលមកធ្វើប្រតិបត្តិការដូចដើមវិញ នៅពេលត្រូវបានបញ្ជាក់អ្នកជំនាញថា វានឹងគ្មានវត្តមានសត្វចង្រៃទេនោះ ហើយយន្តហោះនេះ ក៏ត្រូវបានឆ្លងកាត់ការត្រួតពិនិត្យយ៉ាងដិតដល់ ដើម្បីធានាថា វាពុំបានទទួលរងការខូចខាតណាមួយ បង្កឡើងដោយសត្វកណ្តុរមួយក្បាលនេះផងដែរ៕
