(អ៊ីស្រាអែល)៖ ប្រជាពលរដ្ឋអ៊ីស្រាអែល រួមទាំងប្រជាពលរដ្ឋអ៊ីរ៉ង់ នឹងអាចក្លាយមិត្តដ៏ជិតស្និទ្ធជាមួយគ្នាបាននាពេលអនាគត ក្រោយការដួលរលំនៃរបបដឹកនាំទីក្រុងតេហេរ៉ង់សព្វថ្ងៃ។ នេះបើតាមសម្តីរបស់នាយករដ្ឋមន្រ្តីអ៊ីស្រាអែល លោក ប៊ិនចាមីន ណឺតាន់យ៉ាហ៊ូ (Benjamin Netanyahu) ដកស្រង់ដោយសារព័ត៌មានរុស្ស៊ី Sputnik នៅព្រឹកថ្ងៃអង្គារ ទី០២ ខែមករា ឆ្នាំ២០១៨ ហើយដែលការលើកឡើងនេះ បានកើតមានឡើងតែមួយថ្ងៃប៉ុណ្ណោះ បន្ទាប់ពីលោក ដូណាល់ ត្រាំ ថ្លែងសារមួយគាំទ្រដល់ក្រុមបាតុករអ៊ីរ៉ង់ ដែលនាំរបបដឹកនាំរបបដឹកអ៊ីរ៉ង់ផ្ទុះកំហឹង។
ការលើកឡើងបែបនេះរបស់ លោក Netanyahu ធ្វើឡើងនៅចំពេលដែលបាតុកម្មប្រឆាំងរដ្ឋាភិបាល បាននិងកំពុងផ្ទុះឡើងជាបន្តបន្ទាប់នៅតាមទីក្រុងធំៗនៃប្រទេសអ៊ីរ៉ង់ និងបន្ទាប់ពីប្រធានាធិបតីអ៊ីរ៉ង់ លោក ហាស្សាន រួហានី (Hassan Rouhani) បានព្រលយពាក្យសម្តីថា សត្រូវរបស់ប្រទេសលោក មានការខឹងសម្បារ និងច្រណែនចំពោះភាពរុងរឿង ជោគជ័យ និងវឌ្ឍភាពនៃប្រជាជាតិអ៊ីរ៉ង់ ហើយពួកគេទាំងនោះបានប្តេជ្ញា នាំយកបញ្ហាក្នុងតំបន់ទៅសាបព្រួសក្នុងប្រទេសអ៊ីរ៉ង់។
ថ្លែងក្នុងសារវីដេអូមួយ ដែលបង្ហោះទៅលើបណ្តាញ Twitter នាម្សិលមិញនេះ លោក Benjamin Neyanyahu បាននិយាយថា «របបនេះ (អ៊ីរ៉ង់) កំពុងព្យាយាមយ៉ាងខ្លាំង ដើម្បីចិញ្ចឹមភាពចងកំហឹង ក៏ដូចជាស្អប់ខ្ពើមរវាងពួកយើង។ ប៉ុន្តែពួកគេនឹងមិនអាចជោគជ័យឡើយ។ ម៉្យាងវិញទៀត នៅពេលដែលរបបបច្ចុប្បន្ននេះ ដួលរលំទៅនៅទីបំផុត ហើយថ្ងៃណាមួយវាច្បាស់ជាដូច្នោះនោះ ពលរដ្ឋអ៊ីរ៉ង់ និងអ៊ីស្រាអែល ប្រាកដក្លាយជាមិត្តនឹងគ្នាជាមួយថ្មីម្តងទៀត។ ខ្ញុំសូមជូនពរឲ្យ ប្រជាជនអ៊ីរ៉ង់ទាំងអស់ ទទួលជោគជ័យនៅក្នុងការតស៊ូដ៏អង់អាចរបស់ពួកគេ ដើម្បីសិទ្ធិសេរីភាព»។
គួរជម្រាបថា នៅតាមបណ្តាទីក្រុងធំៗមួយចំនួន ក្នុងប្រទេសអ៊ីរ៉ង់ រួមទាំង តេហេរ៉ង់ (Tehran), ម៉ាសហាដ (Mashhad), អ៊ីស្វាហាន (Isfahan), និង រ៉ាសត៍ (Rasht) បានទទួលរងការធ្វើបាតុកម្មជាលើកដំបូងកាលពីថ្ងៃទី២៨ ខែធ្នូ ឆ្នាំ២០១៧ ហើយចាប់ពីពេលនោះមក មនុស្សម្នាជាច្រើននាក់ បានប្រមូលផ្តុំគ្នាធ្វើការប្រឆាំងតវ៉ាជាបន្តបន្ទាប់ នៅតាមដងផ្លូវ ជុំវិញបញ្ហានៃភាពគ្មានការងារធ្វើ ភាពក្រីក្រ និងការកើនឡើងនៃចំណាយក្នុងជីវភាពរស់នៅ៕
