(វ៉ាស៊ីនតោន)៖ ជនភេទទី ៣ ឬអ្នកកែភេទ ទីបំផុតនឹង​ត្រូវអនុញ្ញាតឲ្យ​ធ្វើការចុះឈ្មោះ​ ដើម្បីចូលបម្រើ​កងទ័ព​អាមេរិក ដោយចាប់ផ្តើម​ពីថ្ងៃចន្ទ​​សប្តាហ៍ក្រោយ​នេះ​តទៅ ក្រោមសេចក្តី​បង្គាប់របស់តុលាការ​សហព័ន្ធ បន្ទាប់ពីរដ្ឋបាល​ប្រធានាធិបតី លោក ដូណាល់ ត្រាំ បាន​សម្រេច​មិនប្តឹង​ទាស់ ចំពោះសាលក្រម​តុលាការ ដែលបានរាំង​ខ្ទប់បម្រាម​​របស់ លោក ត្រាំ ដែលមិនឲ្យ​យោធាអាមេរិក​ទទួល​យក​​អ្នក​ភេទ​ទី​ ៣ ឬកែភេទ។ នេះបើតាមការចេញ​ផ្សាយដោយសារព័ត៌មាន Channel News Asia នៅព្រឹក​ថ្ងៃសៅរ៍ ទី៣០ ខែធ្នូ ឆ្នាំ២០១៧។

តុលាការ​សហព័ន្ធចំនួន ០២ ដោយមួយនៅ​រដ្ឋវ៉ាស៊ីនតោន និងមួយទៀត​នៅរដ្ឋ Virginia កាលពី​សប្តាហ៍មុន បានច្រានចោល​នូវ​សំណើរបស់រដ្ឋបាល លោក ដូណាល់ ត្រាំ ដែលបានស្នើ​ឲ្យពន្យាពេល​អនុវត្តន៍ ទៅលើសាល​ដីកា​ចៅក្រមថ្នា​ក់ក្រោម ដែលទាម​ទារឲ្យយោធា​អាមេរិក ចាប់ផ្តើមទទួល​យកជនភេទទី ៣ ឬកែភេទ ឲ្យបម្រើការ​ក្នុងជួរកងទ័ព​នាថ្ងៃទី០១ ខែមករា ឆ្នាំ២០១៨។ ជាមួយគ្នា​នេះ មន្រ្តីម្នាក់នៃក្រសួង​យុត្តិធម៌អាមេរិក បានឲ្យដឹងថា រដ្ឋបាល លោក ត្រាំ នឹងមិនប្រឆាំង​ចំពោះការសម្រេច​របស់តុលាការទាំង​ ២ ឡើយ។

គួររំលឹកថា កាលពី​ខែកក្កដា ឆ្នាំ២០១៧ លោក ដូណាល់ ត្រាំ បានប្រកាស​ថា រូបលោក នឹងហាមឃាត់​អ្នកកែភេទ មិនឲ្យចូល​បម្រើទ័ពឡើយ ដែលទង្វើនេះ​គឺជាការផ្លាស់ប្តូរ​បកក្រោយវិញ នៃគោលនយោបាយ របស់អតីត​ប្រធានាធិបតី​អាមេរិក លោក បារ៉ាក់ អូបាម៉ា ដែលបាន​ទទួលយក​ពួកគេ៕ ​