(ពិភពលោក)៖ កាលពី​ពីរឆ្នាំមុន លោក ដូណាល់ ត្រាំ (Donald Trump) ត្រឹមតែជា​បេក្ខជនប្រធានាធិបតី​ នៃបក្សសាធារណរដ្ឋ​ម្នាក់ ដែលព្យាយាម​ហែលឆ្លងអាងទឹក​ដ៏ធំ នៃការប្រកួតប្រជែងក្នុងការ​បោះឆ្នោត ជ្រើសរើសប្រធានាធិបតី​ឆ្នាំ២០១៦។ ទោះបីក្លាយ​ជាបេក្ខជនប្រធានាធិបតី​ម្នាក់​ទៅហើយក្តី ក៏លោកនៅ​តែត្រូវបានគេចាត់ទុក​ជាត្លុកកំប្លែង​ម្នាក់ ប៉ុន្តែមហាសេដ្ឋី​អចលនទ្រព្យ​ពាន់លានដុល្លាររូបនេះ ពេលខ្លះគ្មាន​លទ្ធភាព ដើម្បីតបតនឹងការ​យល់ឃើញ​ពីមជ្ឈដ្ឋាន​ជុំវិញខ្លួនរ​បស់លោក​បានឡើយ។

ប៉ុន្តែលោកពិត​ជាចង់ឱ្យសារព័ត៌មាន ជួយឆ្លុះបញ្ចាំង​ពីឆន្ទៈរបស់​លោក ក្នុងនាមបេក្ខភាព​ប្រធានាធិបតី ដោយលោក​ចង់ស្វែងរក​ដំណោះស្រាយ​សន្តិភាព រវាង​អ៊ីស្រាអែល និងប៉ាឡេស្ទីន ដោយលោក​ចាត់ទុកថា នេះជាគោលដៅ​គោលនយោបាយ​ការបរទេស ដ៏សំខាន់មួយ។ «ខ្ញុំគិតថា ប្រសិនបើ​ខ្ញុំជាប់ឆ្នោត​ជាប្រធានាធិបតី ការស្វែងរក​ដំណោះស្រាយ​នេះ គឺជាអ្វីដែល​ខ្ញុំចង់សម្រេច​បានជាខ្លាំង»។ នេះជាការលើក​ឡើងរបស់ លោក Trump ក្នុងបទសម្ភាសន៍​ជាមួយ​សារព័ត៌មាន Associated Press កាលពី​ថ្ងៃទី០៣ ខែធ្នូ ឆ្នាំ២០១៥កន្លង​ទៅនេះ។

លោកបានបន្តថា «ដោយសារវិបត្តិនេះ​បង្កឱ្យមាន​មនុស្សស្លាប់ ចលនាបះបោរ​ជាច្រើន និងការស្អប់ខ្ពើម​គ្នាទៅវិញ​ទៅមក ហេតុនេះវា​នឹងក្លាយជាលទ្ធផលសម្រេច​បាន ដ៏សំខាន់មួយ។ ថ្វីត្បិតវា​ជាការសម្រេច​បានតែមួយ តែជាការសម្រេច​បានដ៏អស្ចារ្យ»។ វាមិនមែន​ជាលើកទី​មួយទេ ដែលបេក្ខជន​ប្រធានាធិបតី Donald Trump បានលើកឡើង​អំពីដំណើរការ​ស្វែងរកសន្តិភាព នៅតំបន់មជ្ឈិមបូព៌ា ហើយវា​ក៏ប្រាកដជាមិនមែន​ជាលើកចុង​ក្រោយដូចគ្នា។ លោកបាន​លើកឡើងថា «មនុស្សភាគ​ច្រើនគិតថា វាជាកិច្ចព្រមព្រៀង​ដ៏លំបាកជាង​គេមួយ។ មនុស្សជា​ច្រើនគិត​បែបនេះ... ប៉ុន្តែ​សម្រាប់ខ្ញុំ អាចនិយាយ​បានថា ខ្ញុំនឹងមានឱកាស​ប្រសើរជាងគេ ដើម្បីសម្រេច​កិច្ចព្រមព្រៀង​នេះ»

បន្ទាប់ពីពិធី​ប្រកាសតែងតាំង​ជាប្រធានាធិបតី លោក Trump បានចាប់ផ្តើម​បំពេញការងារ ព្រមទាំងបាន​ប្រគល់កិច្ចការស្វែង​រកដំណោះស្រាយ នៃវិបត្តិខាងលើ​ទៅក្នុងដៃ លោក Jared Kushner ដែលជា​កូនប្រសារ។ ទង្វើ​បែបនេះ ធ្វើឱ្យមនុស្ស​នៅតំបន់មជ្ឈឹម​បូព៌ាជាច្រើន បានសើចចំអកចំ​ពោះកូនប្រសារ​របស់លោក ដែលជាម្ចាស់​អចលនទ្រព្យ​ដែលមានវ័យ​ទើបតែ ៣៦ ឆ្នាំ មានបទពិសោធន៍​គោលនយោបាយបរទេស​នៅក្មេងខ្ចី​នៅឡើយ ក្នុងការកាន់​កាប់កិច្ចការរវាង​អ៊ីស្រាអែល និងប៉ាឡេស្ទីន។ ប៉ុន្តែយើង​មិនបានដឹង​ទេថា ការពិត លោក Trump ត្រូវការជំនួយ​ការដ៏មានទំនុក​ចិត្តម្នាក់ ហេតុនេះទើប​លោកជ្រើសរើស​សមាជិកគ្រួសារ​របស់គាត់​ផ្ទាល់​ ដើម្បីគ្រប់គ្រង។ វាអាច​បង្ហាញបានថា លោកបាន​ផ្តល់ភាពសំខាន់ជាខ្លាំង​ទៅលើ​បញ្ហានេះ។

នៅពេលដែល លោក Mahmoud Abbas ថ្នាក់ដឹកនាំ​ប៉ាឡេស្ទីន ធ្វើកិច្ចជំនួបជា​មួយលោក Trump នៅសេតវិមានជា​លើកដំបូង​ លោកបានលើក​ឡើងថា «លោក​ប្រធានាធិបតី ខ្ញុំជឿថា យើងស្ថិតក្រោម​ការដឹកនាំ និងការទទួល​ខុសត្រូវពោរពេញ​ដោយ​ភាពវ័យឆ្លាត​របស់លោក ដែលមាន​សមត្ថភាពខ្ពស់ ក្នុងការចរចា​ដើម្បីនាំមកនូវសន្ធិសញ្ញា​សន្តិភាព​ជាប្រវត្តិសាស្ត្រ ...»

ជាមួយនឹង​ការសម្រេចចិត្ត ​កាលពីពេលថ្មីៗ​កន្លងទៅនេះ​របស់ លោក Trump ទទួលស្គាល់​ទីក្រុងដ៏បរិសុទ្ធ ហ្សេរុយសាឡឹម​ ជារដ្ឋធានីនៃប្រទេស​អ៊ីស្រាអែល បានធ្វើឱ្យទំនាក់ទំនង​រវាងគូជម្លោះ​អ៊ីស្រាអែល និងប៉ាឡេស្ទីន ដែលបានប្រឹងប្រែង​ក្នុងការកសាងឡើងនាពេល​កន្លងមក ត្រូវខាតបង់ទាំងអស់។ ឱកាសដែល​សេសសល់​សូម្បីបន្តិចបន្តួច​ សម្រាប់កិច្ច​ព្រមព្រៀង​ចុងក្រោយ គឺត្រូវបានបញ្ចប់​មិនបានសេសសល់​សម្រាប់ពេល​ខាងមុខ។ ការផ្លាស់ប្តូរកំពុង​កើតឡើង​បន្តិចម្តងៗ ហេតុនេះ រឿងរ៉ាវ​អតីតកាល ការចាប់ដៃរលាក់ រឺស្នាមញញឹម​រវាងលោក Trump និងលោក Abbas នឹងគ្មានតទៅ​ទៀត​ឡើយ។

ក្រៅពី​នាយករដ្ឋមន្រ្តី លោក Benjamin Netanyahu និងអ្នកនយោបាយ​អ៊ីស្រាអែល​មួយចំនួន គ្មាននរណាម្នាក់​នៅក្នុងតំបន់​គិតថា សេចក្តីប្រកាសទទួល​ស្គាល់ទីក្រុង​ហ្សេរុយសាឡឹម​ជារដ្ឋធានី​អ៊ីស្រាអែល​ជាផ្លូវការ ជារឿងត្រឹមត្រូវ​នោះទេ។ មិនថា​ពួកអឺរ៉ុប ពួកអារ៉ាប់ ប៉ាឡេស្ទីន អង្គការ​សហប្រជាជាតិ ឬសូម្បីរដ្ឋមន្ត្រី​ការបរទេស​អាមេរិក លោក Rex Tillerson ឬរដ្ឋមន្ត្រី​ការពារជាតិ Jim Mattis ។

សេចក្តីថ្លែងការណ៍​ដ៏រសើបបែបនេះ ពិបាក​ពន្យល់ថា តើអ្វីដែលធ្វើឱ្យសេតវិមាន​ជឿជាក់ថា សេចក្តីប្រកាសនេះ ជាការដឹកនាំទៅ​រកដំណោះស្រាយ​ការទូតនោះ? ប្រធានាធិបតី​ប្រទេស​បារាំង លោក Emmanuel Macron បានអំពាវនាវ​ឱ្យលោក Trump សម្តែង​ការព្រួយ​បារម្ភ បន្ទាប់ពី​រដ្ឋមន្ត្រីការបរទេស​អាល្លឺម៉ង់ លោក Sigmar Gabriel បាន​និយាយជា​សាធារណៈថា «ការរក្សាទីតាំង​ស្ថានទូត​នៅដដែល​ ជាបញ្ហាពាក់ព័ន្ធ​នឹងគ្រប់គ្នា មិនមែន​តែរវាង​អ៊ីស្រាអែល និងប៉ាឡេស្ទីន​នោះទេ»

លោក Frederica Mogherini បេសកជន​ជាន់ខ្ពស់របស់​សហភាពអឺរ៉ុបទទួល​បន្ទុកគោល​នយោបាយ​ការបរទេស បានប្រាប់​រដ្ឋមន្ត្រីការ​បរទេសអាមេរិក លោក Rex Tillerson ថា «រាល់សកម្មភាព​ណាមួយ ដែលនឹងធ្វើឱ្យ​ប៉ះពាល់ដល់កិច្ចប្រឹងប្រែង​កន្លង​មក ត្រូវតែជៀសវាង»។ វាជារឿង​ដ៏លំបាកក្នុង​ការស្វែងរក​មេដឹកនាំណា​ម្នាក់​នៅពិភពឥស្លាម ដែលមិន​ព្រមាន​សេតវិមានថា ការផ្លាស់ប្តូរស្ថានភាព​របស់ក្រុង​ហ្សេរុយសាឡឹម នឹងបង្កឱ្យមាន​អំពើហិង្សា​ផ្ទុះឡើង។

ចំពោះជាតិសាសន៍​អ៊ីស្រាអែល​ក្រុងហ្សេរុយសាឡឹម ជារដ្ឋធានីរបស់អ៊ីស្រាអែល​រួចទៅហើយ។ ជាក់ស្តែង​ការិយាល័យ​របស់ Netanyahu មានវត្តមាន​នៅទីនោះ​ស្រាប់។ ប៉ុន្តែអ្វីដែល​ជាបញ្ហានោះ សូម្បីតែអ្នក​សង្កេតការណ៍​ធម្មតា​បំផុតម្នាក់ នៅនយោបាយ​មជ្ឈិមបូព៌ា​ នឹងប្រាប់​អ្នកថា ប្រជាជនប៉ាឡេស្ទីន​ក៏មានទំនាក់​ទំនង​ខាងសាសនា ដួងវិញ្ញាណ ប្រវត្តិសាស្រ្ត និងនិមិត្តសញ្ញា​ជាមួយទីក្រុង​នេះដូចគ្នា។ វាបង្កជា​បញ្ហាជា​ច្រើន ដែល​គេអាចនិយាយ​បានថា វាគឺផលប្រយោជន៍នយោបាយក្នុងស្រុក។

ការប្រកាស​ជាឯកតោភាគី​របស់​សហរដ្ឋអាមេរិក ចាត់ទុកក្រុង​ហ្សេរ៉ូសាឡឹមថា ជា​រដ្ឋធានី​របស់អ៊ីស្រាអែល គឺជាការជំរុញ​ប្រជាប្រិយភាព​របស់​លោក Trump។ ក្នុងអំឡុង​ពេលសុន្ទរកថា ស្តីអំពីគោលនយោបាយការបរទេស​ដ៏ធំបំផុតមួយ​ ក្នុងនាមជា បេក្ខជន​ប្រធានាធិបតី លោក Trump បានសន្យាដល់​មហាជនថា លោកនឹង​ធ្វើអ្វីដែល គ្មានប្រធានាធិបតី​អាមេរិចណាម្នាក់ធ្លាប់​ធ្វើពីមុនមក មិនថាប្រធានាធិបតី​មកពីគណបក្ស​សាធារណរដ្ឋ ឬគណបក្ស​ប្រជាធិបតេយ្យ​ នោះគឺការផ្លាស់ទីស្ថានទូ​តទៅក្រុងហ្សេរុយសាឡឹម ជារដ្ឋធានីរបស់​ជនជាតិ​ជ្វីប។

«វាគឺជាការ​សន្យាដ៏ធំធេង និងដើម្បីពេញចិត្ត​មនុស្សរាប់​ពាន់នាក់»។ យើងសង្កេត​ឃើញថា សេចក្តីប្រកាស​នេះ​បានបង្កអំពើ​ហិង្សា ដែលអាច​កើតមានឡើង​នៅទាំងនៅតំបន់ West Bank, នៅតំបន់ Gaza នឹងសូម្បីក្នុង​ប្រទេសអ៊ីស្រាអែល​ខ្លួនឯងផ្ទាល់ ប៉ុន្តែ​ហេតុអ្វីបានជា​សហរដ្ឋប្រឹងប្រែង​បែបនេះ? ចម្លើយធំចម្បង គឺដើម្បីផលប្រយោជន៍អាមេរិកខ្លួនឯង៕